ആന കൊടുത്താലും കിളിയേ ആശ കൊടുക്കാമോ എന്ന പഴയ മലയാളം പാട്ട് പാകിസ്താനികൾ കേൾക്കാഞ്ഞത് മോശമായിപ്പോയി. കേട്ടിരുന്നെങ്കിൽ ഈ പാട്ട് പ്രധാനമന്ത്രി ഷെഹ്ബാസ് ഷെരീഫിനെ നോക്കി ഇപ്പോൾ പാകിസ്താനികൾ പാടുമായിരുന്നു. ഇനി പ്രധാനമന്ത്രി പാവങ്ങൾക്ക് കൊടുത്ത ആശ കൂടി അറിയുമ്പോൾ പിന്നെ പാട്ടിനെ കുറിച്ച് അധികം സംശയം തോന്നില്ല.
വികസനത്തിൽ ഇന്ത്യയെ പിന്നാലാക്കാൻ സാധിച്ചില്ലെങ്കിൽ എന്റെ പേര് ഷെഹബാസ് ഷെരീഫ് എന്നല്ല എന്നാണ് പ്രധാനമന്ത്രിയുടെ വെല്ലുവിളി. ദേരാ ഗാസി ഖാനിൽ ഒരു സമ്മേളനത്തിലാണ് ഷെഹബാസിന്റെ വാക്കുകൾ. അഹോരാത്രം കഠിനാധ്വാനം ചെയ്ത് രാജ്യത്തെ അഭിവൃദ്ധിയിലേക്ക് നയിക്കുമെന്നും ഷെരീഫ് പറഞ്ഞു. ഇടയ്ക്ക് ഉപകാര സ്മരണയായി മൂത്ത സഹോദരൻ നവാസ് ഷെരീഫിന്റെ പേര് പറയാനും അനിയൻ മറന്നില്ല.
പ്രധാനമന്ത്രിയുടെ വെല്ലുവിളി സോഷ്യൽ മീഡിയ ഉപയോക്താക്കൾക്ക് ചിരിക്കുള്ള വക നൽകി. ഷെരീഫിന്റെ മാനസിക നില പരിശോധിക്കുന്നത് നല്ലാതായിരിക്കും, ഇന്ന് മരുന്ന് കഴിക്കാൻ മറന്നെന്ന് തോന്നുന്നു തുടങ്ങിയ കമന്റുകളാണ് വീഡിയോയ്ക്ക് താഴെ നിറയുന്നത്.
