നാഗര്‍കോവില്‍: ശിവരാത്രിയോടനുബന്ധിച്ച് തിരുവനന്തപുരം കന്യാകുമാരി ജില്ലകളില്‍ ശിവഭക്തരുടെ ക്ഷേത്ര പരിക്രമമായ ശിവാലയ ഓട്ടം നാളെ ആരംഭിക്കും. ശിവഭക്തരെ വരവേല്‍ക്കാന്‍ കന്യാകുമാരി ജില്ലയിലെ ശിവാലയ ക്ഷേത്രങ്ങളില്‍ പ്രത്യേക ഒരുക്കങ്ങള്‍ പൂര്‍ണ്ണമായി.
ശിവരാത്രിയുടെ ഭാഗമായി കന്യാകുമാരി ജില്ലയിലെ 12 ശിവക്ഷേത്രങ്ങളിൽ ഭക്തർ ഓടി ദർശനം നടത്തുന്ന അത്യപൂർവമായ ആചാരമാണ് ശിവാലയ ഓട്ടം. ഇത് ശിവരാത്രിയുടെ മുൻ ദിവസമായ ഇന്ന് ഫെബ്രുവരി 25 ന് തുടങ്ങും. മഹാശിവരാത്രി 26നാണ്. ശൈവ-വൈഷ്ണവ ബന്ധം ഉറപ്പിക്കുന്ന ശിവാലയ ഓട്ടത്തിൽ ‘ഗോവിന്ദാ…. ഗോപാലാ…’ എന്ന നാമജപവുമായാണ് ഭക്തർ ശിവ ക്ഷേത്രങ്ങളിൽ ദർശനം നടത്തുന്നത്. ശിവാലയ ഓട്ടം പാരമ്പര്യമായി കന്യാകുമാരി ജില്ലയിൽ മാത്രമാണ് ഉള്ളതെന്നും സവിശേഷതയാണ്.
കന്യാകുമാരി ജില്ലയിലെ വിളവന്‍കോട്, കല്‍ക്കുളം താലൂക്കുകളിലായി സ്ഥിതി ചെയ്യുന്ന 12 ശിവക്ഷേത്രങ്ങളില്‍ ഒരു രാത്രിയും ഒരു പകലും കൊണ്ട് നഗ്‌ന പാദരായി നടത്തുന്ന ദര്‍ശനമാണിത്.തിരുമല, തിക്കുറുശ്ശി, തൃപ്പരപ്പ്, തിരുനന്ദിക്കര, പൊന്മന, പന്നിപ്പാകം, കല്‍ക്കുളം, മേലാങ്കോട്, തിരുവിടയ്‌ക്കോട്, തിരുവിതാംകോട്, തൃപ്പന്നികോട്, തിരുനട്ടാലം എന്നീ 12ക്ഷേത്രങ്ങളിലും ഒരു ദിവസംകൊണ്ടു ഓടി ദര്‍ശനം നടത്തുന്ന ആചാരമാണിത്. മഹാഭാരത കഥയുമായി ബന്ധപ്പെട്ടാണ്ശിവാലയഓട്ടത്തിനു പിന്നിലുള്ള ഐതിഹ്യം നിലനില്‍ക്കുന്നത്.
ഇന്ന് സന്ധ്യയ്‌ക്ക് കുളിച്ച് ഈറനോടെ ഒന്നാം ശിവാലയമായ തിരുമലയില്‍ സന്ധ്യാദീപം ദര്‍ശിച്ച് ഓട്ടമാരംഭിക്കും. വെള്ളമുണ്ടോ കാവി മുണ്ടോ ആണ് വേഷം. കൈകളില്‍ വിശറിയുണ്ടാകും. വിശറിയുടെ അറ്റത്ത് രണ്ട് തുണി സഞ്ചികളില്‍ ഒന്നില്‍ പ്രസാദ ഭസ്മവും മറ്റേതില്‍വഴിയാത്രയ്‌ക്കാവശ്യമായ പണവും കരുതും. ‘ ഗോവിന്ദാ ഗോപാല’ എന്ന നാമം ഉദ്ധരിച്ച് പന്ത്രണ്ട് ക്ഷേത്രത്തിലും എത്തുന്നു. ഒടുവിലത്തെ ശിവക്ഷേത്രമായ തിരുനട്ടാലെത്തി ഓട്ടം സമാപിക്കുന്നു.
പാരമ്പര്യ ഓട്ടക്കാർക്കു പുറമേ വാഹനങ്ങളിൽ ദർശനത്തിനെത്തുന്നവരും നിരവധിയാണ്. 25-ന് ആരംഭിക്കുന്ന ഓട്ടം 26 പിന്നിട്ട് 27-ന് രാവിലെവരെ തുടരും.
ശിവാലയങ്ങളിൽ ഭക്തർക്ക് സൗകര്യങ്ങൾ ഒരുക്കിയതായി കന്യാകുമാരി ദേവസ്വം അധികൃതർ അറിയിച്ചു.
