പുതു തലമുറ നിക്ഷേപകര്‍ക്കായി അഞ്ചു പദ്ധതികള്‍ പുനരവതരിപ്പിച്ച് രാജ്യത്തെ ഏറ്റവും വലിയ ഇന്‍ഷുറന്‍സ് കമ്പനിയുടെ ഭാഗമായ എല്‍ഐസി മ്യൂച്വല്‍ ഫണ്ട്. എല്‍ഐസി എംഎഫ് ഫോക്കസ്ഡ് ഫണ്ട്, എല്‍ഐസി എംഎഫ് വാല്യൂ ഫണ്ട്, എല്‍ഐസി എംഎഫ് സ്മോള്‍ കാപ് ഫണ്ട്, എല്‍ഐസി എംഎഫ് മള്‍ട്ടി അസെറ്റ് അലോക്കേഷന്‍ ഫണ്ട്, എല്‍ഐസി എംഎഫ് ഡിവിഡന്റ് യീല്‍ഡ് ഫണ്ട് എന്നിവയാണ് പുനരവതരിപ്പിച്ച അഞ്ചു ഫണ്ടുകള്‍.
വിപണിയിലെ മാറ്റങ്ങള്‍ക്കനുസരിച്ചാണ് ഫണ്ടുകള്‍ വീണ്ടും അവതരിപ്പിച്ചിരിക്കുന്നത്. മികച്ച വളര്‍ച്ചാ സാധ്യതയും മെച്ചപ്പെട്ട പ്രകടനവും നടത്തുന്നതാണ് ഈ ഫണ്ടുകളെന്നും നിക്ഷേപകരുടെ വൈവിധ്യം നിറഞ്ഞ ആവശ്യകതകള്‍ക്ക് ഇതുപകരിക്കുമെന്നും എല്‍ഐസി എംഎഫ് മ്യൂച്വല്‍ ഫണ്ട് എഎംസി ചീഫ് ഇന്‍വെസ്റ്റ്മെന്റ് ഓഫീസര്‍ യോഗേഷ് പാട്ടീല്‍ പറഞ്ഞു.
2025 ഏപ്രിലിലെ കണക്കുകള്‍ പ്രകാരം 41 ഫണ്ടുകളാണ് എല്‍ഐസി മ്യൂച്വല്‍ ഫണ്ട് കൈകകാര്യം ചെയ്യുന്നത്. 15 ഇക്വിറ്റി ഫണ്ടുകളും 9 ഡെറ്റ് ഫണ്ടുകളും 6 ഹൈബ്രിഡ് ഫണ്ടുകളും 10 ഇടിഎഫുകളും ഇതില്‍ ഉള്‍പ്പെടും. പ്രതിമാസം 100 കോടിയിലേറെ രൂപയുടെ എസ്ഐപി വരവുണ്ട് സ്ഥാപനത്തിന്. 2025 മാര്‍ച്ച് മാസം 33,854 കോടിരൂപയുടെ ആസ്തികളാണ് എല്‍ഐസി മ്യൂച്വല്‍ ഫണ്ട് കൈകാര്യം ചെയ്തിരുന്നത്. എന്നാല്‍ 2025 ഏപ്രില്‍ മാസമായപ്പോള്‍ ഇത് 11 ശതമാനം വളര്‍ന്ന് 37,554 കോടി രൂപയായി മാറി.
