ന്യൂയോര്ക്ക്: മുന് അമേരിക്കന് പ്രസിഡന്റ് ജോ ബൈഡന് പ്രോസ്റ്റെറ്റ് കാന്സര് സ്ഥിരീകരിച്ചു. ജോ ബൈഡന്റെ ഓഫീസ് ഞായറാഴ്ച പുറത്തിറക്കിയ പ്രസ്താവനയിലാണ് സ്ഥിരീകരണം ഉണ്ടായത്. കാന്സര് എല്ലുകളിലേക്ക് പടര്ന്നതായി റിപ്പോര്ട്ടുണ്ട്. മൂത്ര സംബന്ധമായ രോഗ ലക്ഷണങ്ങള് കണ്ടതിനെ തുടര്ന്ന് കഴിഞ്ഞ ആഴ്ചയാണ് ജോ ബൈഡന് ആശുപത്രിയിൽ എത്തിയത്. തുടര്ന്ന് വെള്ളിയാഴ്ച നടത്തിയ പരിശോധനയിലാണ് പ്രോസ്റ്റെറ്റ് കാന്സര് രോഗം സ്ഥിരീകരിച്ചത്.
വളരെ വേഗത്തില് പടരുന്ന വിഭാഗത്തില്പ്പെട്ട പ്രോസ്റ്റെറ്റ് കാന്സറാണിത്. കാന്സര് വളരെ വഷളായ നിലയിലായി എന്നാണ് മെഡിക്കൽ റിപ്പോർട്ടുകൾ വ്യക്തമാക്കുന്നത്. രോഗബാധ നിയന്ത്രണ വിധേയമാക്കാമെന്ന സൂചനയും ബൈഡന്റെ ഓഫീസിൽ നിന്ന് നൽകുന്നുണ്ട്.
യുഎസ് പ്രസിഡന്റ് പദവി വഹിച്ച ഏറ്റവും പ്രായമേറിയ വ്യക്തിയാണ് ജോ ബൈഡന്. ജോ ബൈഡന്റെ രോഗനിർണയത്തിൽ യുഎസ് പ്രസിഡന്റ് ഡോണൾഡ് ട്രംപ് ദുഖം രേഖപ്പെടുത്തി. താനും ഭർത്താവ് ഡഗ് എംഹോഫും ബൈഡനും കുടുംബത്തിനും വേണ്ടി പ്രാർഥിക്കുന്നുവെന്ന് മുൻ വൈസ് പ്രസിഡന്റ് കമലാ ഹാരിസ് എക്സിൽ കുറിച്ചു.
