റോയൽ ചലഞ്ചേഴ്സ് ബെംഗളൂരുവിന്റെ കന്നി കിരീടത്തിന് ഒരു വിജയം മാത്രമാണ് അകലം. പഞ്ചാബിനെ തോൽപ്പിച്ചാണ് അവർ കശാല പോരിന് യോഗ്യത നേടിയത്. അതേസമയം ചെന്നൈ സൂപ്പർ കിംഗ്സ് താരമായ അശ്വിൻ ആർ.സി.ബിക്ക് മുന്നറിയിപ്പ് നൽകി. മുംബൈ ഫൈനലിൽ എത്തിയാൽ ആർ.സി.ബിയുടെ 18 കൊല്ലം നീണ്ട സ്വപ്നം പൊലിയുമെന്നാണ് ചെന്നൈ താരത്തിന്റെ മുന്നറിയിപ്പ്.
ആർ.സി.ബിയുടെ ഏറ്റവും വലിയ ഭീഷണി മുംബൈയാകുമെന്നാണ് അശ്വിൻ പറയുന്നത്.എലിമിനേറ്ററിൽ ഇന്നാണ് ഗുജറാത്ത് ടൈറ്റൻസും മുംബൈ ഇന്ത്യൻസും ഏറ്റുമുട്ടുന്നത്. ഛണ്ഡിഗഡിലാണ് മത്സരം. ഈ മത്സരത്തിൽ ജയിക്കുന്നവർ ജൂൺ ഒന്നിന് ക്വാളിഫയർ രണ്ടിൽ പഞ്ചാബിനെതിരെ കളിക്കണം. ഇതിലെ വിജയികളാകും ഫൈനലിന് യോഗ്യത നേടുക.
‘മുംബൈ ഇന്ത്യൻസ് ഫൈനലിൽ എത്താതിരിക്കാൻ ആർ.സി.ബി പ്രാർത്ഥിക്കുക. ആർ.സി.ബിക്കെതിരെ എന്തെങ്കിലും ചാൻസുള്ള ഒരേയൊരു ടീം മുംബൈയാണ്. എന്നാൽ ഇത് ക്രിക്കറ്റാണ് എന്തും സംഭവിക്കാം. ഞാനൊരു ആർ.സി.ബിക്കാരനാണെങ്കിൽ ഗുജറാത്ത് ഫൈനലിൽ വന്നാൽ മതിയെന്നാകും വിചാരിക്കുക. ആർ.സി.ബിക്ക് കിരീടം നേടണമെങ്കിൽ ഗുജറാത്ത് മുംബൈക്ക് എതിരെ ജയിക്കണം. ആർ.സി.ബിയുടെ കിരീട സ്വപ്നങ്ങൾ തകർക്കാൻ കരുത്തുള്ള ഒരു ടീം മുംബൈയാണ്. എന്ത് വിലകൊടുത്തും അവരെ തടയണം”. —-അശ്വിൻ ഒരു വിലയിരുത്തൽ വീഡിയോയിൽ പറഞ്ഞു.
