കഴിഞ്ഞ ദിവസം മുല്ലൻപൂരിൽ നടന്ന ഐപിഎൽ 2025 എലിമിനേറ്ററിൽ, ഗുജറാത്ത് ടൈറ്റൻസിനെതിരെ നേടിയ 20 റൺസിന്റെ ത്രസിപ്പിക്കുന്ന വിജയത്തിൽ നിർണായക പങ്കുവഹിച്ച പേസർ ജസ്പ്രീത് ബുംറയെ പ്രശംസിച്ച് മുംബൈ ഇന്ത്യൻസ് ക്യാപ്റ്റൻ. മുംബൈയിലെ വീടിന്റെ വിലപോലെ തന്നെ ബുമ്രയും ടീമിന് വിലയേറിയ താരമാണെന്ന് ഹാർദിക് പാണ്ഡ്യ പറഞ്ഞു.
കളി കയ്യിൽ നിന്ന് പോകുമെന്ന് തോന്നുമ്പോഴെല്ലാം ബുമ്രയെ കൊണ്ടുവരും. മുംബൈയിലെ വീടുകളുടെ വില പോലെയാണ് – അവൻ അത്രയും വിലയേറിയവനാണ്! അവസാനഓവറുകളിൽ നമുക്ക് കുറച്ച് അധിക റൺസ് നിലനിർത്താൻ കഴിയുമോ എന്ന് ഞാൻ ചിന്തിച്ചിരുന്നു. ബുമ്ര വന്ന് ആ ഓവർ എറിയേണ്ടത് പ്രധാനമായിരുന്നു, അപ്പോൾ മാർജിൻ വലുതാകും.”മത്സരശേഷം ബുമ്രയുടെ പ്രകടനത്തെകുറിച്ച് ചോദിച്ച അവതാരകനോട് പാണ്ഡ്യ പറഞ്ഞു.
മുംബൈ ഉയർത്തിയ 229 റൺസിന്റെ കൂറ്റൻ വിജയലക്ഷ്യം പിന്തുടർന്ന ടൈറ്റൻസിന് ബുമ്രയുടെ മൂന്നാംഓവറിൽ തന്നെ പ്രതീക്ഷകൾ അവസാനിച്ചു. താരത്തിന്റെ അടിപൊളി ഒരു യോർക്കർ വാഷിംഗ്ടൺ സുന്ദറിന്റെ കാലുകൾക്കിടയിലൂടെ മിന്നിപ്പാഞ്ഞ് ലെഗ്സ്റ്റമ്പ് തെറിപ്പിച്ചു. ഇതോടെ ഗുജറത്തിന്റെ പോരാട്ടം 208 ൽ അവസാനിച്ചു.
