മുംബൈ: ഐടി ഓഹരികളിലെ ഗണ്യമായ ഇടിവ് തിങ്കളാഴ്ച ഇന്ത്യന് ഓഹരി വിപണിയെ പിന്നോട്ടടിപ്പിച്ചു. നിഫ്റ്റി ഐടി സൂചിക ഉച്ചയോടെ 1.49% ഇടിഞ്ഞു. ബിഎസ്ഇ സെന്സെക്സ് 415 പോയന്റ് താഴ്ന്ന് 82084 ല് എത്തി. 0.5% ഇടിവാണ് സെന്സെക്സിലുണ്ടായത്. നിഫ്റ്റി 1.5 പോയന്റ് ഇടിഞ്ഞ് 25046 ല് എത്തി.
പ്രമുഖ ഐടി ഓഹരികളെല്ലാം തിങ്കളാഴ്ച നഷ്ടത്തിലായിരുന്നു. നിഫ്റ്റി ഐടി സൂചിക 37,130 വരെ താഴ്ന്നു. ഇന്ഫോസിസിന്റെയും വിപ്രോയുടേയും ഓഹരി വില 2.1 ശതമാനം ഇടിഞ്ഞു. ടെക് മഹീന്ദ്ര 1.70%, എച്ച്സിഎല് ടെക്നോളജീസ് 1.67%, ടാറ്റ കണ്സള്ട്ടന്സി സര്വീസസ് 1.43%, എല്ടിഐമൈന്ഡ്ട്രീ 1.27%, എംഫാസിസ് 0.49% എന്നിങ്ങനെ ഇടിഞ്ഞതോടെ ഐടി സൂചിക കടുത്ത സമ്മര്ദ്ദത്തിലായി.
‘പ്രധാനമായും ഐടി ഓഹരികളിലെ ബലഹീനതയാണ് നിഫ്റ്റി ദുര്ബലമായ പ്രവണത കാണിക്കുന്നതിന് കാരണം. പ്രത്യേകിച്ചും കഴിഞ്ഞ വെള്ളിയാഴ്ച എഫ്ഐഐകള് ക്യാഷ് മാര്ക്കറ്റില് വലിയ വില്പ്പനക്കാരായതിനാല് ഈ ദൗര്ബല്യം നിലനില്ക്കും.’ ജിയോജിത് ഇന്വെസ്റ്റ്മെന്റ് ലിമിറ്റഡിന്റെ ചീഫ് ഇന്വെസ്റ്റ്മെന്റ് സ്ട്രാറ്റജിസ്റ്റ് ഡോ. വി കെ വിജയകുമാര് പറഞ്ഞു.
കഴിഞ്ഞ ദിവസം പുറത്തുവന്ന ടാറ്റ കണ്സള്ട്ടന്സി സര്വീസസിന്റെ (ടിസിഎസ്) ഒന്നാം പാദ ഫലം വിപണി പ്രതീക്ഷിച്ചയത്ര മെച്ചമായിരുന്നില്ല. ഈ വര്ഷം ഐടി ഒഹരികള് കൂടുതല് പ്രതിബന്ധങ്ങള് നേരിട്ടേക്കാമെന്ന വിലയിരുത്തലും വിലയിടിവിന് കാരണമായി. ഇതോടൊപ്പം ഇന്ത്യ-യുഎസ് വ്യാപാര കരാറിലെ അനിശ്ചിതാവസ്ഥകളും ഐടി കമ്പനികളിലെ നിക്ഷേപകരെ ആശങ്കയിലാക്കിയിട്ടുണ്ട്.
‘ഇന്ത്യയ്ക്ക് ഏകദേശം 20% താരിഫ് നിരക്കില് ഉടന് തന്നെ യുഎസ്-ഇന്ത്യ വ്യാപാര കരാര് വിപണി പ്രതീക്ഷിക്കുന്നുണ്ട്. ഇത് സംഭവിച്ചാല് വിപണിക്ക് വികാരപരമായ ഉത്തേജനം ലഭിക്കും. ഈ രംഗത്തെ ഏത് നിരാശയും വിപണിയെ കൂടുതല് താഴേക്ക് വലിച്ചിടും,’ ഡോ. വി കെ വിജയകുമാര് കൂട്ടിച്ചേര്ത്തു.
വിപണി 25,000 ലെവല് നിലനിര്ത്തുകയാണെങ്കില് ട്രെന്ഡ് പോസിറ്റീവ് ആകാമെന്ന് വെല്ത്ത്മില്സ് സെക്യൂരിറ്റീസ് െ്രെപവറ്റ് ലിമിറ്റഡിന്റെ ഇക്വിറ്റി സ്ട്രാറ്റജി ഡയറക്ടര് ക്രാന്തി ബഥിനി പറഞ്ഞു.25,000 ലെവല് നിലനിര്ത്തുന്നതില് നിഫ്റ്റി പരാജയപ്പെട്ടാല് വിപണി താഴേക്ക് ഇറങ്ങുമെന്നും അദ്ദേഹം നിരീക്ഷിച്ചു.
വാണവരും വീണവരും
എറ്റേണല് 2.32%, ടൈറ്റന് 0.80%, സണ് ഫാര്മ 0.63%, ഐടിസി 0.53%, അദാനി പോര്ട്ട്സ് 0.41% എന്നിങ്ങനെയാണ് ഇന്ന് ബിഎസ്ഇ സെന്സെക്സില് നേട്ടമുണ്ടാക്കിയ ടോപ് 5 ഓഹരികള്. ടെക് മഹീന്ദ്ര 1.70%, ഇന്ഫോസിസ് 1.69%, ബജാജ് ഫിനാന്സ് 1.55%, ഏഷ്യന് പെയിന്റ്സ് 1.52%, ടാറ്റ കണ്സള്ട്ടന്സി സര്വീസസ് 1.50% എന്നിങ്ങനെയാണ് നഷ്മുണ്ടാക്കിയ പ്രധാന കമ്പനികള്.
