പാലക്കാട്: പാലക്കാട്ടെ ട്രെയിൻ അട്ടിമറിശ്രമത്തിൽ സമഗ്ര അന്വേഷണം വേണമെന്ന് ബിജെപി ആവശ്യപ്പെട്ടു.പാലക്കാട് ഒറ്റപ്പാലത്ത് അജ്ഞാതർ റെയിൽവേ ട്രാക്കിൽ ഇരുമ്പ് ക്ലിപ്പുകൾ വച്ച് ട്രെയിൻ അട്ടിമറിക്കാൻ ശ്രമിക്കുകയായിരുന്നു.
ഈ സംഭവത്തിൽ സമഗ്ര അന്വേഷണം വേണമെന്ന് ബിജെപി വെസ്റ്റ് ജില്ലാ അധ്യക്ഷൻ പി.വേണുഗോപാൽ ആവശ്യപ്പെട്ടു.
“കോയമ്പത്തൂർ സ്ഫോടനം കേസിലെയും,ശ്രീനിവാസൻ വധക്കേസിലെയും പ്രതികൾ ഒളിവിൽ കഴിഞ്ഞ പ്രദേശമാണ് ഒറ്റപ്പാലം. അതുകൊണ്ടുതന്നെ ട്രെയിൻ അട്ടിമറി ശ്രമത്തിൽ വിശദമായ അന്വേഷണം വേണം.തീവ്രവാദ ശക്തികൾ ഇതിന് പിന്നിൽ ഉണ്ടോ എന്ന് അന്വേഷിക്കണം.” പി.വേണുഗോപാൽ ആവശ്യപ്പെട്ടു.
നേരത്തെ പ്രദേശത്ത് വെച്ച് തന്നെ തീവണ്ടിക്ക് നേരെ കല്ലേറുണ്ടായിട്ടുണ്ട്. അതുകൊണ്ടുതന്നെ കേരള പോലീസും ആർപിഎഫും വിശദമായ അന്വേഷണം നടത്തണമെന്നും ബിജെപി ആവശ്യപ്പെട്ടു
പാലക്കാട് ഒറ്റപ്പാലത്ത് റെയിൽപാളത്തിൽ ഇരുമ്പ് ക്ലിപ്പുകൾ കണ്ടെത്തുകയായിരുന്നു. പാളത്തിലെ അഞ്ചിടങ്ങളിലാണ് ഇരുമ്പ് ക്ലിപ്പുകൾ കണ്ടെത്തിയത്.
ഒറ്റപ്പാലം – ലക്കിടി റെയിൽവേ സ്റ്റേഷനുകൾക്കിടയിലാണ് സംഭവം. മായന്നൂർ മേൽപ്പാലത്തിന് സമീപമാണ് ഇരുമ്പ് ക്ലിപ്പുകൾ കണ്ടെത്തിയത്. ആർപിഎഫും കേരള പൊലീസും സ്ഥലത്ത് പരിശോധന നടത്തി.
