ഇന്ന് ചട്ടമ്പി സ്വാമി ജയന്തി ആണെന്ന് രമേശ് ചെന്നിത്തല; ഹൈന്ദവ ആചാര്യന്മാരുടെ ജന്മദിനത്തിന് നക്ഷത്രമാണ് കണക്കിലെടുക്കുന്നതെന്ന് സോഷ്യൽ മീഡിയ

തിരുവനന്തപുരം : ഇന്ന് ചട്ടമ്പി സ്വാമി ജയന്തി ആണെന്ന് രമേശ് ചെന്നിത്തല. ഇത് സംബന്ധിച്ച് സോഷ്യൽ മീഡിയയിൽ അദ്ദേഹം അനുസ്മരണ പോസ്റ്റും ചെയ്തിട്ടുണ്ട്. “പുരുഷ കേന്ദ്രീകൃതമായിരുന്ന സമൂഹത്തിൽ സ്ത്രീ സ്വാതന്ത്ര്യത്തിനും സുരക്ഷയ്‌ക്കും വേണ്ടി പൊരുതിയ ധിഷണാ ശാലി ആയിരുന്നു ചട്ടമ്പി സ്വാമികൾ” എന്ന് രമേശ് ചെന്നിത്തല അനുസ്മരിക്കുന്നു

എന്നാൽ വിദ്യാധിരാജ ചട്ടമ്പിസ്വാമികളുടെ ജന്മദിനമായി ആഘോഷിക്കപ്പെടുന്നതും ആചരിക്കപ്പെടുന്നതും ചിങ്ങമാസത്തിലെ ഭരണി നക്ഷത്രമാണ്. ഇന്ന് ഉത്രം നക്ഷത്രം ആണ്. നാളെ അത്തവും. പിന്നെ എങ്ങിനെയാണ് ഇന്ന് വിദ്യാധിരാജ ചട്ടമ്പിസ്വാമി ജയന്തി ആയതെന്ന് സോഷ്യൽ മീഡിയയിൽ ചോദ്യങ്ങൾ ഉയരുന്നു

വിദ്യാധിരാജ ചട്ടമ്പിസ്വാമികൾ ജനിച്ചത് 1853 ഓഗസ്റ്റ് 25ന് ആണ്. എങ്കിലും അദ്ദേഹത്തിന്റെ ജന്മദിനമായി നാളിതുവരെ ആചരിച്ചു വന്നിട്ടുള്ളത് ജന്മനക്ഷത്രമായ ചിങ്ങമാസത്തിലെ ഭരണിയാണ്. അത് ഈ വര്ഷം സെപ്റ്റംബർ 12 നാണ്. ഹൈന്ദവ രീതിയിൽ പല ആചാര്യന്മാരുടെയും ജന്മദിനം അങ്ങനെയാണ് ആചരിച്ചു വന്നിട്ടുള്ളത്. നാരായണഗുരുദേവന്റെ ജന്മദിനം ചിങ്ങമാസത്തിലെ ചതയം നക്ഷത്രത്തിലാണ് ആഘോഷിക്കുന്നത്. നാരായണഗുരു ജനിച്ച ക്രിസ്തുവർഷ കലണ്ടറിലെ തീയതി അല്ല ഗുരുദേവ ജയന്തിക്ക് ആചരണീയം.

ചട്ടമ്പി സ്വാമികളുടെ സമാധി സ്ഥലമായ കൊല്ലം പന്മന ആശ്രമത്തിലും ചിങ്ങ മാസത്തിലെ ഭരണി ദിനമാണ് ജയന്തി ദിനമായി ആചരിക്കുന്നത്. എന്നാൽ കേരളാ സർക്കാർ ചട്ടമ്പി സ്വാമിയുടെ ജനന ദിവസമായ ഓഗസ്റ് 25 ന് ജീവകാരുണ്യ ദിനം എന്ന പേരിൽ ചില പരിപാടികൾ പ്രഖ്യാപിച്ചിട്ടുണ്ട്. ഇതിന്റെ ചുവടു പിടിച്ചാണോ രമേശ് ചെന്നിതലയും ഇന്ന് വിദ്യാധിരാജ ചട്ടമ്പിസ്വാമി ജയന്തി ആണെന്ന് പറയുന്നത് എന്ന് വ്യക്തമല്ല.