ഇടുക്കി : ഇടമലക്കുടി ഗ്രാമപഞ്ചായത്തിലെ വിവിധ വനവാസി കുടികളിലേക്ക് സോളാർ ഹോം സിസ്റ്റങ്ങൾ വിതരണം ചെയ്ത് സ്വാമി വിവേകാനന്ദ മെഡിക്കൽ മിഷൻ. ഷ്നൈഡർ ഇലക്ട്രിക്കിന്റെ സഹകരണത്തോടെ 250 വീടുകളിലേക്കാണ് സൗര സംവിധാനങ്ങൾ വിതരണം ചെയ്തത്. ഓരോ യൂണിറ്റിലും മൂന്നു എൽ ഈ ഡി ലൈറ്റുകളും , ഒരു ഹെഡ് ലാമ്പും, ബാറ്ററി സംവിധാനവും, സോളാർ പാനലും ഉണ്ട്.
ആണ്ടവൻ കുടി, കവക്കാട്ടു കുടി, അമ്പലപ്പടി കുടി, അമ്പലപാറ കുടി, കണ്ടത്തിക്കുടി, പരപ്പായർകുടി, തേൻപാറ കുടി, വെള്ളവരക്കുടി തുടങ്ങി വൈദ്യുതി ഇല്ലാത്ത ഗ്രാമങ്ങളിലാണ് ഇവ വിതരണം ചെയ്തത്. ഇടമലക്കുടി പഞ്ചായത്ത് വാർഡ് മെമ്പർമാർ, സഹ്യഗിരി വികസന പദ്ധതിയുടെ സംഘടനാ സെക്രട്ടറി ശ്രീ. ടി എൽ രാധാകൃഷ്ണൻ, സ്വാമി വിവേകാനന്ദ മെഡിക്കൽ മിഷൻ പ്രതിനിധികൾ എന്നിവർ വിതരണത്തിന് നേതൃത്വം നൽകി. അവശേഷിക്കുന്ന വൈദ്യുതി ഇല്ലാത്ത വീടുകളിലേക്ക് സൗരോർജ്ജത്തിൽ പ്രവർത്തിക്കുന്ന ഇത്തരം സംവിധാനങ്ങൾ എത്തിക്കാൻ ഉള്ള ശ്രമങ്ങൾ നടന്നു വരുന്നു.
ആരോഗ്യവും വിദ്യാഭ്യാസവും ഉപജീവനവും മെച്ചപ്പെടുത്താൻ വിവേകാനന്ദ മെഡിക്കൽ മിഷൻ ഇടുക്കിയിലും പാലക്കാട് ജില്ലയിലുമുള്ള വനവാസി മേഖലകളിൽ നിരവധി സേവന പ്രവർത്തനങ്ങൾ നടത്തിവരുന്നു. കടുത്ത മലനിരകളും, നടന്ന് മാത്രമേ എത്താവുന്ന കാട്ടുവഴികളും കാരണം, വൈദ്യുത കണക്ഷനുകൾ ഇടമലക്കുടിയിലെ നിരവധി വീടുകളിൽ ഇപ്പോളും എത്തിയിട്ടില്ല.
വനവാസി സമൂഹത്തിനായി പ്രകാശവും പ്രതീക്ഷയും സമ്മാനിച്ചതിന് ഷ്നൈഡർ ഇലക്ട്രിക് ഇലക്ട്രിക്കിനോട് വിവേകാനന്ദ മെഡിക്കൽ മിഷൻ പ്രതിനിധികളും വനവാസി സമൂഹവും ഹൃദയം നിറഞ്ഞ നന്ദി രേഖപ്പെടുത്തി.
