മലയാളത്തിന്റെ നടനവിസ്മയം മോഹൻലാലിന്റെ സൂപ്പർ ഹിറ്റ് ചിത്രം രാവണപ്രഭു വീണ്ടും പ്രേക്ഷകരിലേക്ക്. പുതിയ ദൃശ്യ- ശബ്ദ വിസ്മയങ്ങളോടെ 4K ആറ്റ്മോസിലാണ് രാവണപ്രഭു വീണ്ടും തിയേറ്ററിലെത്തുന്നത്. ഒക്ടോബർ പത്തിനായിരിക്കും രാവണപ്രഭു എത്തുക.
രഞ്ജിത്ത് തിരക്കഥ രചിച്ച് സംവിധാനം ചെയ്ത അതിഗംഭീര ചിത്രമായ രാവണപ്രഭു വീണ്ടും എത്തുന്നതിന്റെ സന്തോഷത്തിലാണ് ആരാധകർ. ചിത്രത്തിലെ മംഗലശേരി നീലകണ്ഠനും മുണ്ടക്കൽ ശേഖരനുമൊക്കെ പ്രേക്ഷകരുടെ എക്കാലത്തെയും ജനപ്രിയ കഥാപാത്രങ്ങളാണ്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിച്ച ചിത്രം മാറ്റിനി നൗആണ് 4K അറ്റ്മോസിൽ എത്തിക്കുന്നത്.
മോഹൻലാലിന്റെ ഗംഭീര കഥാപാത്രങ്ങളിലൊന്നാണ് മംഗലശേരി നീലകണ്ഠൻ. മുണ്ടുടുത്ത്, മീശ പിരിച്ച് ചാരുകസേരയിരിക്കുന്ന മംഗലശേരി നീലകണ്ഠനെ മലയാളികൾക്ക് ഒരിക്കലും മറക്കാനാകില്ല. മോഹൻലാൽ ഡബിൾ റോളിലെത്തി തകർത്ത് അഭിനയിച്ച സിനിമയാണ് രാവണപ്രഭു. കഥയും കഥാപാത്രങ്ങളും കൊണ്ട് സിനിമാസ്വാദകരെ പിടിച്ചിരുത്താനും രസിപ്പിക്കാനും ചിത്രത്തിന് സാധിച്ചിട്ടുണ്ട്.
അടുത്തിടെ ചിത്രത്തിന്റെ റീ റിലീസ് ടീസർ പുറത്തുവിട്ടിരുന്നു. ചിത്രത്തിന്റെ സവിശേഷതകളും മികച്ച രംഗങ്ങളും കോർത്തിണയാക്കിയാണ് ടീസർ പുറത്തുവിട്ടത്. 2001-ലാണ് രാവണപ്രഭു റിലീസ് ചെയ്തത്.
