ആലപ്പുഴ: തദ്ദേശ സ്വയംഭരണ തെരഞ്ഞെടുപ്പില് സീറ്റ് കിട്ടാത്തതില് മനംനൊന്ത് കോണ്ഗ്രസ് പ്രവര്ത്തകന് ആത്മഹത്യയ്ക്കു ശ്രമിച്ചു. ആലപ്പുഴ ജില്ലയിലെ പത്തിയൂരിലാണ് സംഭവം. പത്തിയൂർ ഗ്രാമപഞ്ചായത്ത് 19-ാം വാര്ഡിലെ ബൂത്ത് പ്രസിഡന്റ് നിരണത്ത് സി. ജയപ്രദീപാണ് ജീവനൊടുക്കാന് ശ്രമിച്ചത്. വീട്ടുകാര് ഇയാളെ രക്ഷപ്പെടുത്തി.
ജയപ്രദീപ് പോസ്റ്റര് പതിച്ചും ഫ്ലക്സ് അടിച്ചും തെരഞ്ഞെടുപ്പ് പ്രചാരണം തുടങ്ങിയിരുന്നു. പറഞ്ഞ് ഉറപ്പിച്ച സീറ്റ് ഒടുവിൽ ഗ്രൂപ്പുകളിയുടെ ഭാഗമായി സീറ്റ് നിഷേധിക്കുകയായിരുന്നു കേരള കോൺഗ്രസ്സ് ജോസഫ് വിഭാഗത്തിന് നൽകിയതോടെയാണ് ആത്മഹത്യ ശ്രമം. ഡിസിസി പ്രസിഡന്റിനെ വീട്ടിൽ പോയി കണ്ട് സംസാരിച്ചിട്ടും നടപടിയായില്ലന്ന് ജയപ്രദീപ് പറയുന്നു. കെട്ടി ഇറക്കിയ സ്ഥാനാർഥിക്ക് വേണ്ടി പ്രചാരണത്തിന് ഇറങ്ങില്ലെന്ന് മണ്ഡലം പ്രസിഡന്റ് രാജീവ് വള്ളിയത്ത് പറഞ്ഞു.
