ഇന്ത്യൻ വനിതാ ക്രിക്കറ്റ് താരം സ്മൃതി മന്ദാനയുടെ പ്രതിശ്രുത വരനെ അസുഖ ബാധിതനായി ആശുപത്രിയിൽ പ്രവേശിപ്പിച്ചു. അണുബാധയെ തുടർന്നാണ് പലാശ് മുച്ചാലിനെ ആശുപത്രിയിൽ പ്രവേശിപ്പിച്ചത്. സംഗീത സംവിധായകനാണ് പലാശ് മുച്ചാൽ.
ഹൃദായാഘാതത്തെ തുടർന്ന് സ്മൃതി മന്ദാനയുടെ പിതാവ് ശ്രീനിവാസ് മന്ദാന ആശുപത്രിയിലായതിന് പിന്നാലെ വിവാഹം മാറ്റിവച്ചിരുന്നു. ഞായറാഴ്ചയായിരുന്നു വിവാഹം നിശ്ചയിച്ചിരുന്നത്. പുതിയ വിവാഹ തീയതി കുടുംബം പ്രഖ്യാപിച്ചിട്ടില്ല.
സ്മൃതി മന്ദാനയുടെ പിതാവ് ചികിത്സയിൽ കഴിയുന്ന സാംഗ്ലിയിലെ സർവിത് ആശുപത്രിയിൽ തന്നെയാണ് പലാശിനെയും പ്രവേശിപ്പിച്ചത്. വൈറസ്ബാധയും അസിഡിറ്റി പ്രശ്നങ്ങളുമാണ് പലാശിനുണ്ടായിരുന്നത്. സ്ഥിതി മെച്ചപ്പെട്ടതിനെ തുടർന്ന് പലാശ് ആശുപത്രിയിൽ നിന്ന് ഹോട്ടലിലേക്ക് മടങ്ങിയെന്നും റിപ്പോർട്ടുകളുണ്ട്. വിവാഹം മാറ്റിവച്ചതിനെ തുടർന്ന് പലാശ് കടുത്ത മാനസിക സമ്മർദ്ദത്തിലായെന്നും ഇതോടെയാണ് ആരോഗ്യം മോശമായതെന്നും അമ്മ അമിത മുച്ചൽ പറഞ്ഞിരുന്നു.
ഹാൽദി, മെഹന്തി ചടങ്ങുകൾക്ക് പിന്നാലെയാണ് ശ്രീനിവാസ് മന്ദാനയ്ക്ക് നെഞ്ചുവേദന അനുഭവപ്പെട്ടത്. നിലവിൽ ഡോക്ടർ സംഘത്തിന്റെ നിരീക്ഷണത്തിലാണ് അദ്ദേഹം. ആശങ്കപ്പടേണ്ട സാഹചര്യമില്ലെന്നും ആരോഗ്യനിലയിൽ പുരോഗതിയുണ്ടെന്നും സ്മൃതി മന്ദാനയുടെ കുടുംബ ഡോക്ടർ ഡോ. നമൻ ഷാ പറഞ്ഞു.
