തിരുവനന്തപുരം: സംസ്ഥാനത്തെ സർക്കാർ ഓഫീസുകളുടെ പ്രവർത്തിദിനം ആഴ്ചയിൽ അഞ്ചായി കുറയ്‌ക്കുന്നത് സംബന്ധിച്ച് സർവീസ് സംഘടനകളുമായി ചീഫ്സെക്രട്ടറി നടത്തുന്ന ഓൺലൈൻ യോഗം തെരഞ്ഞെടുപ്പ് പ്രഹസനമാക്കരുതെന്ന് എൻജിഒ സംഘ്. ഡിസംബർ അഞ്ചിനാണ് ഇതുമായി ബന്ധപ്പെട്ട് ഓൺലൈൻ യോഗം വിളിച്ചിരിക്കുന്നത്.
മൂന്ന് മാസങ്ങൾക്ക് മുമ്പ് ഈ വിഷയത്തിൽ സർവീസ് സംഘടനകളുമായി നേരിട്ടുള്ള ചർച്ച നിശ്ചയിച്ചിരുന്ന യോഗം മാറ്റിവയ്‌ക്കുകയായിരുന്നു. ഇപ്പോൾ തദ്ദേശ തെരഞ്ഞെടുപ്പ് പെരുമാറ്റചട്ടം നിലനിൽക്കുന്ന സാഹചര്യത്തിൽ വളരെ ധൃതിപിടിച്ച് ഓൺലൈൻ യോഗം നടത്താനുള്ള തീരുമാനം രാഷ്‌ട്രീയ ആക്ഷേപങ്ങൾക്ക് ഇടയാക്കിയിട്ടുണ്ട്.
അതിനാൽ തെരഞ്ഞെടുപ്പിന് ശേഷം നേരിട്ടുള്ള യോഗം വിളിച്ച് ചർച്ച നടത്താൻ സർക്കാർ തയ്യാറാകണമെന്ന് കേരള എൻ ജി ഒ സംഘ് സംസ്ഥാന പ്രസിഡന്റ്‌ ജെ. മഹാദേവൻ, ജനറൽ സെക്രട്ടറി എസ്. രാജേഷ് എന്നിവർ ആവശ്യപ്പെട്ടു.
