ലക്നൗ: ലോകത്തിലെ ഏറ്റവും ഉയരം കൂടിയ പ്രതിമയായ സ്റ്റാച്യു ഓഫ് യൂണിറ്റിയുടെ ഡിസൈനറും ശിൽപിയുമായ രാം സുതൻ അന്തരിച്ചു. 100 വയസായിരുന്നു. കഴിഞ്ഞ ദിവസം രാത്രി നോയിഡയിലെ വസതിയിലായിരുന്നു അന്ത്യം. വാർദ്ധക്യസഹജമായ അസുഖങ്ങളെ തുടർന്ന് ചികിത്സയിലായിരുന്നു അദ്ദേഹം.
രാം സുതന്റെ മകൻ അനിൽ സുതാനാണ് മരണവിവരം അറിയിച്ചത്. മുംബൈയിലെ ജെജെ സ്കൂൾ ഓഫ് ആർട്ട് ആൻഡ് ആർക്കിടെക്ചറിൽ നിന്ന് സ്വർണ മെഡൽ നേടിയ സുതറിന് നേട്ടങ്ങളുടെ ഒരു നീണ്ട പട്ടിക തന്നെയുണ്ട്.
മഹത്തരമായ നിരവധി ശിൽപങ്ങൾ അദ്ദേഹം രാജ്യത്തിന് വേണ്ടി സമർപ്പിച്ചിട്ടുണ്ട്. മഹാത്മാഗാന്ധിയുടെ പ്രതിമകളും പാർലമെന്റ് വളപ്പിൽ കുതിരപ്പുറത്ത് സവാരി ചെയ്യുന്ന ഛത്രപതി ശിവാജിയുടെ പ്രതിമകളും അദ്ദേഹത്തിന്റെ ഏറ്റവും മികച്ച സൃഷ്ടികളിൽ ഉൾപ്പെട്ടതാണ്. രാജ്യത്തിന്റെ ആദ്യത്തെ ഉപപ്രധാനമന്ത്രിയായ സർദാർ വല്ലഭ്ഭായ് പട്ടേലിനെ ആദരിക്കുന്ന സ്റ്റാച്യു ഓഫ് യൂണിറ്റി ലോകത്തിന്റെ ചരിത്രത്താളുകളിൽ ഇടംപിടിച്ച പ്രതിമയാണ്. പത്മശ്രീയും പത്മഭൂഷണും നൽകി രാജ്യം അദ്ദേഹത്തെ ആദരിച്ചിരുന്നു.
