തിരുവനന്തപുരം: വിവാദ പാരഡി ഗാനത്തിൽ കേസെടുക്കണ്ടെന്ന് തീരുമാനിച്ച് സംസ്ഥാന സർക്കാർ. നിയമവശങ്ങൾ പരിശോധിച്ചതിന് ശേഷമായിരിക്കും നടപടികൾ ഉണ്ടാവുക. പാരഡി ഗാനത്തിൽ കേസെടുക്കേണ്ടതില്ലെന്ന് ക്രമസമാധാന ചുമതലയുള്ള എഡിജിപി തിരുവനന്തപുരം സിറ്റി സൈബർ പൊലീസിന് നിർദേശം നൽകിയിട്ടുണ്ട്.
വിവാദമായ ‘പോറ്റിയെ’ കേറ്റിയേ എന്ന പാരഡി ഗാനം സോഷ്യൽമീഡിയയിൽ പിൻവലിക്കരുതെന്ന് ആവശ്യപ്പെട്ട് പ്രതിപക്ഷ നേതാവ് വി ഡി സതീശൻ മെറ്റയ്‌ക്ക് പരാതി നൽകാനിരിക്കെയാണ് തീരുമാനത്തിൽ മാറ്റമുണ്ടായത്. സോഷ്യൽമീഡിയയിൽ ഉൾപ്പെടെ വിമർശനങ്ങൾ ശക്തമായതോടെയാണ് തീരുമാനം.
അയ്യപ്പഭക്തിഗാനത്തെ ആക്ഷേപിച്ചെന്ന് കാണിച്ചാണ് കേസെടുക്കാൻ പൊലീസ് തയാറായത്. ഗാനരചയിതാവ് കുഞ്ഞബ്ദുള്ള, ഡാനിഷ് മലപ്പുറം, സിഎംഎസ് മീഡിയ. സുബൈര്‍ പന്തല്ലൂർ എന്നിവരെയാണ് പ്രതിചേർത്തിട്ടുള്ളത്.
സിപിഎമ്മിന്റെ ശബരിമല സ്വർണക്കള്ളക്കടത്തിനെ കുറിച്ചുള്ള പാരഡി ഗാനം പുറത്തുവന്നതിന് പിന്നാലെ തന്നെ ഇത് സർക്കാരിനെ ചൊടിപ്പിച്ചിരുന്നു. തുടർന്ന് തെരഞ്ഞെടുപ്പ് കമ്മീഷന് പരാതി നൽകുകയും ചെയ്തു.
