കളമശേരി: ആവശ്യപ്പെട്ട ഭൂമി വിട്ടുകൊടുക്കാത്തതിന്റെ വൈരാഗ്യത്തില് കേന്ദ്ര പൊതു മേഖലാ സഥാപനമായ എച്ച്എംടി യോട് കേരളാ വൈദ്യതി വകുപ്പിന്റെ പ്രതികാര നടപടി. വൈദ്യുതി കുടിശിക ഇനത്തില് നല്കാനുള്ള തുകയുടെ മറവിൽ എച്ച്എംടി യുടെ ഫ്യൂസ് കെഎസ്ഇബി ഊരി.ഇന്നലെ രാവിലെ 10നാണ് കമ്പനിക്കുള്ള വൈദ്യുതി വിതരണം നിര്ത്തിവച്ചത്. കമ്പനിക്കൊപ്പം ക്വാര്ട്ടേഴ്സുകളിലേക്കുള്ള വൈദ്യുതിയും നിലച്ചു. കമ്പനിയിലെ സ്ഥിരം തൊഴിലാളികള്ക്കൊപ്പം കരാര് തൊഴിലാളികളുടെയും ഉപജീവനത്തെ കാര്യമായി ബാധിക്കും.വൈദ്യുതി കുടിശിക ഇനത്തില് നല്കാനുള്ള രണ്ട് മാസത്തെ കുടിശിക തുകയായ 35 ലക്ഷം രൂപ അടച്ചിരുന്നു. എന്നിട്ടും വൈദ്യുതി ബന്ധം വിച്ഛേദിച്ചത് പ്രതിഷേധാര്ഹമാണെന്ന് തൊഴിലാളി യൂണിയനുകള് ആരോപിച്ചു.
30 കോടിയോളം രൂപ അടയ്ക്കാനുണ്ടെന്നു പറഞ്ഞാണ് കെഎസ്ഇബി എച്ച്എംടിയുടെ വൈദ്യുതി വിച്ഛേദിച്ചത്. 2007 വരെയുള്ള വൈദ്യുതി കുടിശിക ഇനത്തില് ഏകദേശം 14 കോടി രൂപ കെഎസ്ഇബിക്ക് അടയ്ക്കണമെന്ന് ആവശ്യപ്പെട്ട് കമ്പനിക്ക് നോട്ടീസ് നല്കിയിരുന്നു. ഇതിനെ തുടര്ന്ന് നടന്ന ഒറ്റത്തവണ തീര്പ്പാക്കല് ചര്ച്ചയുടെ അടിസ്ഥാനത്തില് കുടിശിക 11 കോടി രൂപയായി പുനര് നിശ്ചയിക്കപ്പെട്ടിരുന്നു. ഈ തുകയില് 8.5 കോടി രൂപ മൂലധന കുടിശികയായും 2.5 കോടി രൂപ പലിശയായും വിഭജിക്കാന് ധാരണയായിരുന്നു.
പലിശ തുക അഞ്ച് തുല്യതവണകളായി അടയ്ക്കാന് ധാരണ ആവുകയും ധാരണ പ്രകാരം 8.5 കോടി രൂപ മൂലധന കുടിശിക 2008 മാര്ച്ചില് തന്നെ പൂര്ണമായും കെഎസ്ഇബിക്ക് അടച്ചതായും ബിഎംഎസ് യൂണിയന് നേതാക്കള് വ്യക്തമാക്കി. ശേഷിച്ച പലിശ തുകയിലേക്കുള്ള ആദ്യ ഗഡുവായി 50 ലക്ഷം രൂപ അടുത്തമാസം തന്നെ അടയ്ക്കാന് കമ്പനി തയ്യാറായെങ്കിലും പലിശ തുകയ്ക്ക് പകരം സ്ഥലം കൈമാറണമെന്ന വ്യവസ്ഥ കെഎസ്ഇബി മുന്നോട്ടു വച്ചതായി നേതാക്കള് പറയുന്നു. ഹെഡ് ഓഫീസില് നിന്നും അനുമതി ലഭിക്കുന്ന സാഹചര്യത്തില് സ്ഥലം വിട്ടുകൊടുക്കാന് തയാറാണെന്ന് കമ്പനി അധികൃതര് കെഎസ്ഇബിയെ അറിയിച്ചതായും നേതാക്കള് പറഞ്ഞു.
എന്നാല് സ്ഥലത്തിന്റെ വില നിശ്ചയിക്കുന്നതില് ധാരണ എത്താത്തതിനാല് നടപടിക്രമങ്ങളുടെ വീഴ്ചയാല് പ്രസ്തുത ഇടപാട് നീണ്ടുപോയി. ഇതിനിടയില് പലിശ ഇനത്തില് അടയ്ക്കാന് നല്കിയ ആദ്യ ഗഡുവായ 50 ലക്ഷം രൂപ പലിശയില് കണക്കാക്കുന്നതിന് പകരം തുടര് മാസങ്ങളിലെ ബില്ലുകള്ക്ക് മുന്കൂര് തുകയായി കെഎസ്ഇബി ക്രമീകരിച്ചതായി യൂണിയന് നേതാക്കള് ആരോപിച്ചു. മുന്പ് 70 ഏക്കര് ഭൂമി വിറ്റ തുക കമ്പനിക്ക് ലഭിച്ചിരുന്നു. അതിനാല് കുടിശിക തീര്ക്കുന്നതില് മനഃപൂര്വ്വമായ അലംഭാവം കമ്പനിക്ക് ഉണ്ടായിരുന്നില്ല.
പ്രതിരോധ സ്ഥാപനങ്ങള് ഉള്പ്പടെ നിരവധി കേന്ദ്ര-സംസ്ഥാന സര്ക്കാര് സ്ഥാപനങ്ങളുടെ നിര്ണായക ഓര്ഡറുകള് എച്ച്എംടി കമ്പനിയില് നിര്മാണ ഘട്ടത്തില് ഇരിക്കുകയാണ്. ഇവ സമയബന്ധിതമായി കൊടുത്തു തീര്ക്കാന് കഴിഞ്ഞില്ലെങ്കില് കമ്പനിക്ക് വലിയ ബാധ്യതകള് വരുത്തും. പ്രതിസന്ധിഘട്ടത്തില് നിന്നും കരകയറുന്ന സാഹചര്യത്തില് കേന്ദ്ര പൊതുമേഖല സ്ഥാപനത്തിനുമേല് അനാവശ്യ സമ്മര്ദ്ദങ്ങള് മനഃപൂര്വ്വം സൃഷ്ടിക്കുന്നത് സ്ഥാപനത്തിന്റെ നിലനില്പ്പിനെയും പുനരുജ്ജീവന ശ്രമങ്ങളെയും ദോഷകരമായി ബാധിക്കുമെന്ന് ബിഎംഎസ് യൂണിയന് ജനറല് സെക്രട്ടറി ശ്രീജേഷ് പറഞ്ഞു.
