കാസര്കോട്: 32ാമത് സ്വദേശി സയന്സ് കോണ്ഗ്രസിന് കേരള കേന്ദ്ര സര്വകലാശാല വേദിയാകും. സ്വദേശി ശാസ്ത്ര പ്രസ്ഥാനം – കേരളയുമായി സഹകരിച്ച് ജനുവരി ഏഴ് മുതല് ഒന്പത് വരെ കേരള കേന്ദ്ര സര്വകലാശാലയുടെ പെരിയ ക്യാമ്പസിലാണ് പരിപാടി.
“വികസിത ഭാരതത്തിനായുള്ള ശാസ്ത്ര സാങ്കേതിക വിദ്യാഭ്യാസം” എന്ന വിഷയത്തില് നടക്കുന്ന മൂന്ന് ദിവസത്തെ സമ്മേളനം ഏഴിന് രാവിലെ 10ന് കേരള ഗവര്ണര് രാജേന്ദ്ര വിശ്വനാഥ് ആര്ലേക്കര് ഉദ്ഘാടനം ചെയ്യും.
വൈസ് ചാന്സലര് പ്രൊഫ. സിദ്ദു പി. അല്ഗുര് അധ്യക്ഷത വഹിക്കും. വിജ്ഞാന് ഭാരതി സെക്രട്ടറി ജനറല് വിവേകാനന്ദ പൈ മുഖ്യാതിഥിയാകും. രജിസ്ട്രാര് ഇന് ചാര്ജ്ജ് ഡോ. ആര്. ജയപ്രകാശ്, ഫിനാന്സ് ഓഫീസര് ഇന് ചാര്ജ്ജ് പ്രൊഫ. രാജേന്ദ്ര പിലാങ്കട്ട, സ്വദേശി ശാസ്ത്ര പ്രസ്ഥാനം – കേരള പ്രസിഡണ്ട് ശിവകുമാര് വേണുഗോപാല്, 32ാമത് സ്വദേശി സയന്സ് കോണ്ഗ്രസ് സെക്രട്ടറി ഡോ. ജാസ്മിന് എം. ഷാ, അധ്യാപകര്, ഗവേഷകര് എന്നിവര് സംബന്ധിക്കും. ശാസ്ത്ര മേഖലയിലെ സമഗ്ര സംഭാവനക്ക് സ്വദേശി ശാസ്ത്ര പുരസ്കാരങ്ങള് സമ്മാനിക്കും.
മൂന്നൂറിലേറെ ശാസ്ത്രജ്ഞരും ഗവേഷകരും പങ്കെടുക്കുന്ന സമ്മേളനം രാജ്യത്തിന്റെ ശാസ്ത്ര സാങ്കേതിക പുരോഗതിക്ക് അനിവാര്യമായ വിഷയങ്ങള് ചര്ച്ച ചെയ്യുതിനുള്ള വേദിയായി മാറും. ഫിസിക്കല് സയന്സസ്, എഞ്ചിനീയറിംഗ്, ബയോളജിക്കല് സയന്സസ്, ബോട്ടണി, അഗ്രിക്കള്ച്ചര്, ഹോര്ട്ടിക്കള്ച്ചര്, ഫോറസ്ട്രി, ഹെല്ത്ത് സയന്സസ്, എര്ത്ത് സയന്സസ്, ഭാരതീയ ജ്ഞാന പരമ്പര എന്നീ മേഖലകളെ അടിസ്ഥാനമാക്കി പ്രബന്ധാവതരണം, ചര്ച്ചകള്, പ്രഭാഷണങ്ങള്, സംവാദങ്ങള് തുടങ്ങിയവ നടക്കും. നാഷണല് ഇന്സ്റ്റിറ്റ്യൂട്ട് ഫോര് ഇന്റര് ഡിസിപ്ലിനറി സയന്സ് ആന്റ് ടെക്നോളജി ഡയറക്ടര് ഡോ. സി. അനന്തരാമകൃഷ്ണന് സി.വി. രാമന് അനുസ്മരണ പ്രഭാഷണവും കേരള യൂണിവേഴ്സിറ്റി വൈസ് ചാന്സലര് പ്രൊഫ. മോഹനന് കുന്നുമ്മല് പി. പരമേശ്വരന് അനുസ്മരണ പ്രഭാഷണവും നടത്തും. ഭാരതീയ ജ്ഞാന പരമ്പര എന്ന വിഷയത്തില് അമൃത സ്കൂള് ഓഫ് ആര്ട്സ് ആന്റ് സയന്സ് ഡീനും ഡയറക്ടറുമായ പ്രൊഫ. യു. കൃഷ്ണകുമാര് സംസാരിക്കും.
ആറ് വേദികളിലായി 19 സെഷനുകള് ഉണ്ടാകും. ഓരോ സെഷനിലെയും മികച്ച പ്രബന്ധത്തിന് യുവ ശാസ്ത്ര പുരസ്കാരവും മികച്ച ഓറല് പ്രസന്റേഷനുകള്, പോസ്റ്റര് പ്രസന്റേഷനുകള് എന്നിവക്ക് 20 വീതം അവാര്ഡുകളും നല്കും. ശാസ്ത്രജ്ഞരുമായുള്ള സ്കൂള് വിദ്യാര്ത്ഥികളുടെയും അധ്യാപകരുടെയും സംവാദമാണ് മറ്റൊരു ആകര്ഷണം. ജനുവരി 9ന് സമാപന സമ്മേളനത്തില് കൊടഗ് യൂണിവേഴ്സിറ്റി വൈസ് ചാന്സലര് പ്രൊഫ. അശോക് എസ് ആളൂര് സമാപന പ്രഭാഷണം നടത്തും. ഇന്ത്യയുടെ സമ്പന്നമായ ശാസ്ത്ര പൈതൃകത്തെ സമകാലിക ഗവേഷണവുമായി ബന്ധിപ്പിക്കുന്നതിനുള്ള വേദിയാണ് സ്വദേശി സയന്സ് കോണ്ഗ്രസെന്ന് വൈസ് ചാന്സലര് പ്രൊഫ. സിദ്ദു പി. അല്ഗുര് പറഞ്ഞു. വിവിധ വിഷയങ്ങളിലുള്ള ചിന്തകളെ പരിപോഷിപ്പിക്കാനും കണ്ടെത്തലുകളെ പ്രോത്സാഹിപ്പിക്കുന്നതിനും വികസിത് ഭാരതത്തിനായുള്ള മുന്നേറ്റത്തില് പങ്കുവഹിക്കുന്നതിനും ഇതിലൂടെ സര്വകലാശാലക്ക് അവസരം ലഭിക്കുന്നു. അദ്ദേഹം വിശദീകരിച്ചു.
