കൊച്ചി: ‘ദക്ഷിണേന്ത്യയുടെ കുംഭമേള’ എന്നറിയപ്പെടുന്ന മഹാമാഘ മഹോത്സവം 2026, പുണ്യനദിയായ ഭാരതപ്പുഴയുടെ തീരമായ മലപ്പുറം ജില്ലയിലെ തിരുനാവായയിലും താപസന്നൂരിലുമായി 18 മുതല്‍ ഫെബ്രുവരി മൂന്ന് വരെ നടക്കും. 250 വര്‍ഷങ്ങള്‍ക്ക് മുന്‍പ് ബ്രിട്ടീഷുകാരുടെ ഇടപെടലോടെയാണ് ഈ ഹിന്ദുധര്‍മ്മയജ്ഞം നിലച്ചുപോയതെന്ന് മഹാമണ്ഡലേശ്വര്‍ സ്വാമി ആനന്ദവനം ഭാരതി വാര്‍ത്താസമ്മേളനത്തില്‍ പറഞ്ഞു.
മഹാമാഘ മഹോത്സവത്തില്‍ ഓരോ ദിവസവും അരലക്ഷം പേരെയാണ് പ്രതീക്ഷിക്കുന്നതെന്നും സ്വാമി പറഞ്ഞു. മാഘഗുപ്ത നവരാത്രി ആരംഭ ദിനമായ 19ന് രാവിലെ 11ന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ മഹാമാഘ മഹോത്സവത്തിന്റെ ധര്‍മ്മധ്വജാരോഹണം നിര്‍വഹിക്കും.
ഭാരതപ്പുഴയുടെ ഉത്ഭവസ്ഥാനമായ തമിഴ്നാട്ടിലെ ത്രിമൂര്‍ത്തി മലയില്‍ നിന്നും തിരുനാവായ ത്രിമൂര്‍ത്തി സംഗമത്തിലേക്കുള്ള മഹാമേരു രഥയാത്രയ്‌ക്കും 19ന് രാവിലെ തുടക്കമാകും. തമിഴ്നാട്ടിലെ പ്രമുഖ ആധീനങ്ങള്‍ പങ്കെടുക്കുന്ന യാത്ര ഭാരതീയ ധര്‍മ്മ പ്രചാരസഭയുടെ ആചാര്യന്‍ യതീശാനന്ദനാഥന്‍ ഡോ. ശ്രീനാഥ് കാരയാട്ട് ആണ് നയിക്കുന്നത്. 19ന് വൈകിട്ട് 6ന് തിരുനാവായയില്‍ മോഹന്‍ജി ഫൗണ്ടേഷന്‍ നേതൃത്വം നല്‍കുന്ന നിളാ ആരതിക്കും തുടക്കമാകും. ബ്രഹ്‌മര്‍ഷി മോഹന്‍ജി പ്രഥമ ആരതി നടത്തും. കാശി ദശാശ്വമേധ് ഘാട്ടിലെ ഗംഗാ ആരതി പണ്ഡിറ്റുകള്‍ അര്‍ച്ചകരാകുന്ന ആരതി ഫെബ്രുവരി മൂന്ന് വരെ ദിവസവും വൈകിട്ട് നിളാതീരത്തു നടക്കും. മാഘമഹോത്സവത്തില്‍ ദിവസവും രാവിലെ വേദഘോഷത്തോടെ നടക്കുന്ന സ്‌നാനത്തിനും വൈദിക ക്രിയകള്‍ക്കും ഗായത്രി ഗുരുകുലം ആചാര്യന്‍ അരുണ്‍ പ്രഭാകര്‍ നേതൃത്വം നല്‍കും. പ്രധാനദിനമായ മാഘപൂര്‍ണിമയിലെ തൈപ്പൂയാഘോഷങ്ങള്‍ എല്‍എംആര്‍കെ ക്യാപ്റ്റന്‍ രജിത് കുമാറിന്റെ നേതൃത്വത്തിലാണ് സംഘടിപ്പിക്കപ്പെടുന്നത്.
എല്ലാ ദിവസവും നവകോടി നാരായണജപാര്‍ച്ചന നടക്കും. ഓരോ ക്ഷേത്രങ്ങളില്‍ നിന്നും ദീപവുമായി എത്തുന്ന ഭക്തസമിതികള്‍ക്ക് മാഘവൃക്ഷവും രക്ഷാദേവതകളുടെ ആസ്ഥാനവുമായ അശ്വത്ഥവൃക്ഷത്തൈ പ്രസാദമായി നല്‍കും. ഫെബ്രുവരി മൂന്നിന് മകം നാളില്‍ രാവിലെ നടക്കുന്ന അമൃതസ്‌നാനത്തോടേയും യതിപൂജയോടെയുമാണ് മഹോത്സവം സമാപിക്കുന്നത്.
മഹോത്സവത്തിന് മുന്നോടിയായുള്ള പ്രായശ്ചിത്തശ്രാദ്ധങ്ങള്‍ 16 മുതല്‍ 18 വരെ നടക്കും. തുടര്‍ന്ന് 19 മുതല്‍ ഒരോ തിഥികളുടേയും ദേവതകള്‍ക്ക് പ്രത്യേക പൂജകളും ഉണ്ടാകും. കേരളത്തിന്റെ നാനാഭാഗങ്ങളില്‍ നിന്നും എല്ലാ പരമ്പരകളിലുംപെട്ട ആചാര്യന്മാര്‍ പൂജകള്‍ക്ക് കാര്‍മികത്വം വഹിക്കും. സ്വാമി അഭിനവ ബാലാനന്ദഭൈരവനാണ് മാഘയജ്ഞ പദ്ധതികള്‍ സംയോജിപ്പിച്ചിട്ടുള്ളത്. മലയാളി അസോസിയേഷന്‍ ഓഫ് നോര്‍ത്ത് അമേരിക്കന്‍ ഹിന്ദൂസ്- മന്ത്ര ആണ് മാഘയജ്ഞ ക്രിയകളുടെ സംഘാടനം നിര്‍വഹിക്കുന്നത്.
മാഘമേളക്കെത്തുന്ന വിവിധ പരമ്പരകളുടെ പ്രത്യേക അനുഷ്ഠാനങ്ങളും സത്സംഗങ്ങളും വിദ്വല്‍സദസുകളും കളരി, യോഗ അനുഷ്ഠാനങ്ങളും കലാവതരണങ്ങളും അടക്കം നിരവധി പരിപാടികള്‍ക്ക് നിളാതീരം വേദിയാകും. 18 മൗനി അമാവാസി, 19 മാഘപ്രതിപദം, 22 ഗണേശ ജയന്തി, 23 വസന്ത പഞ്ചമി, 25 രഥ സപ്തമി, 26 ഭീഷ്മാഷ്ടമി, 27 മഹാനന്ദാനവമി, 28 ഗുപ്തവിജയദശമി, 29 ജയ ഏകാദശി. ഫെബ്രുവരി ഒന്നിന് തൈപ്പൂയവും മാഘപൗര്‍ണമിയും, 3ന് മകം നക്ഷത്രം എന്നിവയാണ് മാഘമഹോത്സവക്കാലത്തെ വിശിഷ്ടമായ തിഥികളും മുഖ്യ സ്‌നാനദിവസങ്ങളും
രജിസ്‌ട്രേഷന്‍, സന്നദ്ധ പ്രവര്‍ത്തക പങ്കാളിത്തം എന്നിവ സംബന്ധിച്ച വിവരങ്ങള്‍ ഔദ്യോഗിക വെബ്‌സൈറ്റ് വഴി ലഭ്യമാണ്. വാര്‍ത്താസമ്മേളനത്തില്‍ ചെയര്‍മാനും തിരുനാവായ നാവാമുകുന്ദ ക്ഷേത്രം മേല്‍ശാന്തിയുമായ അരീക്കര സുധീര്‍ നമ്പൂതിരി, വര്‍ക്കിങ് ചെയര്‍മാന്‍ കെ. ദാമോദരന്‍, ചീഫ് കോഓര്‍ഡിനേറ്റര്‍ കെ. കേശവദാസ് എന്നിവരും പങ്കെടുത്തു.
