ആലപ്പുഴ: അർത്തുങ്കൽ സെന്റ് ആൻഡ്രൂസ് ബസിലിക്കയിൽ വിശുദ്ധ സെബസ്ത്യാനോസിന്റെ മകരം തിരുനാളിനോട് അനുബന്ധിച്ച് വിശുദ്ധന്റെ തിരുസ്വരൂപം വഹിച്ചുള്ള പ്രദക്ഷിണം ജനുവരി 20 ചൊവ്വാഴ്ച നാളെ നടക്കും. തിരുനാളിന്റെ പ്രധാന ദിനമായ ചൊവ്വാഴ്ച വൈകിട്ട് 4.30നാണ് പ്രദക്ഷിണം. തിരുനാൾ സമാപിക്കുന്ന 27 വരെ തിരുസ്വരൂപം ദേവാലയത്തിന്റെ തിരുനടയിൽ പ്രതിഷ്ഠിക്കും. ഇന്നലെ ദിവ്യബലിക്ക് ഫാ. യേശുദാസ് കൊടിവീട്ടിൽ കാർമികത്വം വഹിച്ചു.
പ്രദക്ഷിണം പ്രമാണിച്ച് ജനുവരി 20ന് ആലപ്പുഴയിലെ 2 താലൂക്കുകളില് അവധി പ്രഖ്യാപിച്ചു, ചേര്ത്തല, അമ്പലപ്പുഴ താലൂക്കുകളിലെ സംസ്ഥാന സര്ക്കാര് ഓഫിസുകള്ക്കും, വിദ്യാഭ്യാസ സ്ഥാപനങ്ങള്ക്കും പ്രാദേശിക അവധി ബാധകമാണ്. പൊതു പരീക്ഷകള് മുന് നിശ്ചയ പ്രകാരം നടത്തുന്നതായിരിക്കും.
അർത്തുങ്കൽ സെന്റ് ആൻഡ്രൂസ് ബസിലിക്കയിലെ വിശുദ്ധ സെബസ്ത്യാനോസിന്റെ 380-ാമത് മകരം തിരുനാളിന് ജനുവരി 10ന് തുടക്കമായി. തിരുക്കർമങ്ങൾക്ക് ആലപ്പുഴ രൂപത അധ്യക്ഷൻ ബിഷപ്പ് ജെയിംസ് ആനാപറമ്പിൽ മുഖ്യ കാർമികത്വം വഹിച്ചു. 17 ദിവസം നീണ്ടുനിൽക്കുന്ന തിരുനാളിന് ജനുവരി 27ന് സമാപനമാകും
