തിരുവനന്തപുരം: സംസ്ഥാനത്തെ വിവിധ ഭാഗങ്ങളില് ഉയര്ന്ന അള്ട്രാവയലറ്റ് വികിരണം രേഖപ്പെടുത്തി. ഇതേതുടർന്ന് ദുരന്തനിവാരണ അതോറിറ്റി ജാഗ്രതാ നിര്ദേശം നല്കി. പത്തനംതിട്ട, കോട്ടയം, മലപ്പുറം ജില്ലകളില് അള്ട്രാവയലറ്റ് സൂചിക അപകടകരമായ നിലയിലേക്ക് ഉയര്ന്നിട്ടുണ്ട്. കോന്നി(പത്തനംതിട്ട), ചങ്ങനാശേരി(കോട്ടയം), പൊന്നാനി(മലപ്പുറം) എന്നിവിടങ്ങളിലാണ് ഏറ്റവും ഉയര്ന്ന വികിരണം . ഇവിടെ യുവി ഇന്ഡക്സ് 7 ആണ് രേഖപ്പെടുത്തിയത്.
കൊട്ടാരക്കര(കൊല്ലം), കളമശേരി(എറണാകുളം), തൃത്താല(പാലക്കാട്), ബേപ്പൂര്(കോഴിക്കോട്), മാനന്തവാടി(വയനാട്) എന്നീ സ്ഥലങ്ങളില് സൂചിക 6 ആണ് .ഇവിടെ ‘മഞ്ഞ അലര്ട്ട്’ പ്രഖ്യാപിച്ചു. തിരുവനന്തപുരം(വിളപ്പില്ശാല), ആലപ്പുഴ(ചെങ്ങന്നൂര്), ഇടുക്കി(മൂന്നാര്), തൃശൂര് (ഒല്ലൂര്), കണ്ണൂര്(ധര്മ്മടം), കാസര്കോട്(ഉദുമ) എന്നിവിടങ്ങളില് സൂചിക 4 മുതല് 5 വരെയാണ്.
പകല് 10 മണി മുതല് 3 മണി വരെയുള്ള സമയങ്ങളിലാണ് ഉയര്ന്ന അള്ട്രാവയലറ്റ് സൂചിക രേഖപ്പെടുത്തപ്പെടുന്നത്. അതിനാല് ആ സമയങ്ങളില് കൂടുതല് നേരം ശരീരത്തില് നേരിട്ട് സൂര്യപ്രകാശം ഏല്ക്കുന്നത് പരമാവധി ഒഴിവാക്കുക.ഈ പ്രദേശങ്ങളില് താമസിക്കുന്നവര് ആവശ്യമായ മുന്കരുതലുകള് സ്വീകരിക്കണം.
തുടര്ച്ചയായി കൂടുതല് സമയം അള്ട്രാവയലറ്റ് രശ്മികള് ശരീരത്തില് ഏല്ക്കുന്നത് സൂര്യാതപത്തിനും ത്വക്ക് രോഗങ്ങള്ക്കും നേത്രരോഗങ്ങള്ക്കും മറ്റ് ആരോഗ്യ പ്രശ്നങ്ങള്ക്കും കാരണമായേക്കാം. പൊതുജനങ്ങള് സുരക്ഷാമുന്കരുതലുകള് സ്വീകരിക്കണം.
