കൊച്ചി: യുവനടിയെ പീഡിപ്പിച്ചെന്ന പരാതിയില് സംവിധായകന് രഞ്ജിത്തിനെ പിടികൂടിയത് കൃത്യമായ ആസൂത്രണത്തോടെയെന്ന് കൊച്ചി സിറ്റി പോലീസ് കമ്മിഷണര് എസ്. കാളിരാജ് മഹേഷ് കുമാര്. കഴിഞ്ഞ രണ്ട് ദിവസമായി പോലീസ് നിരീക്ഷണത്തിലായിരുന്ന രഞ്ജിത്ത്, ഒളിവില് പോകാന് ശ്രമിക്കുന്നതിനിടെയാണ് പിടിയിലായതെന്ന് അദ്ദേഹം വ്യക്തമാക്കി. കൊച്ചിയില് മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഷൂട്ടിങ് സെറ്റില് വെച്ചുണ്ടായ അതിക്രമത്തെക്കുറിച്ച് അവിടെയുണ്ടായിരുന്ന മറ്റുള്ളവര്ക്ക് അറിവുണ്ടായിരുന്നു. ദുരനുഭവം ഉണ്ടായ ഉടന് തന്നെ നടി പുറത്തുവന്ന് ഇക്കാര്യം അറിയിച്ചെങ്കിലും, കൂടെയുണ്ടായിരുന്നവര് അവരെ ആശ്വസിപ്പിച്ച് പറഞ്ഞയക്കുകയാണ് ചെയ്തതെന്ന് കമ്മിഷണര് പറഞ്ഞു. അതിക്രമത്തിന് ശേഷം നടി കടുത്ത മാനസികാഘാതത്തിലായിരുന്നു. കഴിഞ്ഞയാഴ്ച കുടുംബത്തോടൊപ്പമെത്തി പരാതി നല്കുമ്പോഴും അവര് ആ ഞെട്ടലില് നിന്ന് മുക്തയായിരുന്നില്ല. തുടര്ന്ന് നടിക്ക് ആവശ്യമായ സൈക്യാട്രിക് ചികിത്സ നല്കിയ ശേഷമാണ് മൊഴി രേഖപ്പെടുത്തിയത്.
വനിതാ ഉദ്യോഗസ്ഥയുടെ നേതൃത്വത്തില് രൂപീകരിച്ച പ്രത്യേക സംഘം പ്രാഥമിക അന്വേഷണം പൂര്ത്തിയാക്കിയ ശേഷമാണ് അറസ്റ്റ് നടപടികളിലേക്ക് നീങ്ങിയത്. തൊഴിലിടങ്ങളിലെ അതിക്രമങ്ങള് തടയുക എന്ന ലക്ഷ്യത്തോടെയാണ് പോലീസ് ഈ കേസിനെ ഗൗരവമായി കാണുന്നത്. തന്നെക്കാള് ഉന്നതനായ വ്യക്തിക്കെതിരെ പരാതി നല്കുക എന്നത് നടിക്ക് വലിയ വെല്ലുവിളിയായിരുന്നു. ഇരയുടെ സ്വകാര്യത സംരക്ഷിച്ചു കൊണ്ട് അന്വേഷണം മുന്നോട്ട് കൊണ്ടുപോകാനാണ് പോലീസ് മുന്ഗണന നല്കുന്നത്. നടിയെ തിരിച്ചറിയുന്ന രീതിയിലുള്ള വിവരങ്ങള് നല്കരുതെന്ന് മാധ്യമങ്ങളോട് കമ്മിഷണര് അഭ്യര്ത്ഥിച്ചു.
അതേസമയം, പരാതി നല്കുന്നതില് നിന്ന് നടിയെ ആരെങ്കിലും തടയാനോ സ്വാധീനിക്കാനോ ശ്രമിച്ചിട്ടുണ്ടോ എന്ന് അന്വേഷിക്കുമെന്ന് പ്രത്യേക അന്വേഷണസംഘം തലവന് ഡിസിപി അശ്വതി ജിജി അറിയിച്ചു. ‘നടിയുടെ മൊഴിയില് പരാമര്ശിച്ചിട്ടുള്ള സാക്ഷികളുടെ മൊഴികള് വരും ദിവസങ്ങളില് രേഖപ്പെടുത്തും. കേസില് കൂടുതല് വ്യക്തത വരുത്തുന്നതിനായുള്ള ശാസ്ത്രീയമായ അന്വേഷണമാണ് നടക്കുന്നത്.’ – ഡിസിപി അശ്വതി ജിജി പറഞ്ഞു. സിനിമാ മേഖലയിലെ തൊഴിലിടങ്ങളില് സ്ത്രീകള് നേരിടുന്ന സുരക്ഷാ പ്രശ്നങ്ങളെക്കുറിച്ച് ഗൗരവമായ ചര്ച്ചകള്ക്ക് ഈ അറസ്റ്റ് വഴിവെച്ചിരിക്കുകയാണ്.
യുവനടിയുടെ പരാതിയില് ഇന്നലെ രാത്രിയാണ് രഞ്ജിത്തിനെ അറസ്റ്റ് ചെയ്തത്. കസ്റ്റഡിയിലെടുത്ത രഞ്ജിത്തിന് ശാരീരിക അസ്വസ്ഥതകള് ഉണ്ടായതിനെ എറണാകുളം ജനറല് ആശുപത്രിയില് പ്രവേശിപ്പിച്ചിരുന്നു. അദ്ദേഹത്തെ 14 ദിവസത്തേക്ക് റിമാന്ഡ് ചെയ്തിരിക്കുകയാണ്. ഉടന് തന്നെ അദ്ദേഹത്തെ എറണാകുളം സബ് ജയിലിലേക്ക് കൊണ്ടുപോകും. അതേസമയം, ഇന്ന് തന്നെ ജാമ്യാപേക്ഷ സമര്പ്പിക്കുമെന്ന് രഞ്ജിത്തിന്റെ അഭിഭാഷകന് പറഞ്ഞു ഫോര്ട്ട് കൊച്ചിയിലെ സിനിമാ ലൊക്കേഷനില് വച്ച് പീഡിപ്പിക്കാന് ശ്രമിച്ചെന്ന നടിയുടെ പരാതിയെ തുടര്ന്നാണ് തൊടുപുഴയില് നിന്ന് രഞ്ജിത്തിനെ അറസ്റ്റ് ചെയ്തത്. രഞ്ജിത്ത് പുതിയതായി സംവിധാനം ചെയ്യുന്ന സിനിമയില് അഭിനയിക്കുന്ന നടിയാണ് പരാതിക്കാരി. സിനിമാ ചിത്രീകരണത്തിനിടെ രഞ്ജിത്ത് കയറിപ്പിടിച്ചു എന്നാണു പരാതി.
