വാഷിംഗ്ടണ്‍: ദശകങ്ങള്‍ നീണ്ട കാത്തിരിപ്പിന് വിരാമമിട്ട് ചന്ദ്രനിലേക്കുള്ള മനുഷ്യന്റെ മടക്കയാത്രയില്‍ വിപ്ലവകരമായ നാഴികക്കല്ല് പിന്നിട്ട് നാസയുടെ ആര്‍ട്ടെമിസ് ദൗത്യം. ഭൂമിയില്‍ നിന്ന് ഏറ്റവും കൂടുതല്‍ ദൂരം സഞ്ചരിച്ച മനുഷ്യരെന്ന 54 വര്‍ഷം പഴക്കമുള്ള റെക്കോര്‍ഡ് ആര്‍ട്ടെമിസ് ദൗത്യസംഘം സ്വന്തമാക്കി. ഇന്ത്യന്‍ സമയം ചൊവ്വാഴ്ച പുലര്‍ച്ചെ 4.35-ഓടെ ഭൂമിയില്‍ നിന്ന് ഏകദേശം 4.06 ലക്ഷം കിലോമീറ്റര്‍ (252,757 മൈല്‍) അകലെയെത്തിയതോടെയാണ് ഈ ചരിത്രനേട്ടം കുറിക്കപ്പെട്ടത്.
1970-ല്‍ അപ്പോളോ 13 ദൗത്യത്തിലെ യാത്രികര്‍ സ്ഥാപിച്ച റെക്കോര്‍ഡാണ് ഇതോടെ തിരുത്തപ്പെട്ടത്. അപ്പോളോ സംഘം സഞ്ചരിച്ചതിനേക്കാള്‍ 6,602 കിലോമീറ്റര്‍ അധിക ദൂരത്തിലൂടെയാണ് ഇപ്പോള്‍ ഒറിയോണ്‍ പേടകം കുതിക്കുന്നത്. അമേരിക്കക്കാരായ റെയ്ഡ് വീസ്മാന്‍, വിക്ടര്‍ ഗ്ലോവര്‍, ക്രിസ്റ്റീന കോക്ക് എന്നിവരും കാനഡക്കാരനായ ജെറെമി ഹാന്‍സനുമാണ് ഈ ചരിത്ര ദൗത്യത്തിലെ അംഗങ്ങള്‍. 1972-ലെ അപ്പോളോ-17 ന് ശേഷം ചന്ദ്രന്റെ ഇത്രയും അരികിലെത്തുന്ന ആദ്യ മനുഷ്യസംഘമാണിത്.
ചന്ദ്രന്റെ ഭ്രമണപഥത്തിലേക്കുള്ള പ്രവേശനത്തിനിടെ പേടകം വലിയൊരു വെല്ലുവിളിയെയും അതിജീവിച്ചു. ചന്ദ്രന്റെ മറുപുറത്തുകൂടിയുള്ള യാത്രയ്‌ക്കിടെ ചൊവ്വാഴ്ച പുലര്‍ച്ചെ 4.14 മുതല്‍ ഏകദേശം 40 മിനിറ്റോളം ഭൂമിയുമായുള്ള ആശയവിനിമയം പൂര്‍ണ്ണമായും തടസ്സപ്പെട്ടു. ചന്ദ്രന് തടസ്സമായതിനെത്തുടര്‍ന്ന് നാസയുടെ ഡീപ് സ്പെയ്സ് നെറ്റ്വര്‍ക്കിന് സിഗ്‌നലുകള്‍ സ്വീകരിക്കാന്‍ കഴിയാത്തതിനാലാണിത്. ഈ സമയമത്രയും പേടകം പൂര്‍ണ്ണമായും ഇരുട്ടിലായിരുന്നുവെങ്കിലും നിശ്ചയിച്ച പാതയിലൂടെ സുരക്ഷിതമായി ഒറിയോണ്‍ യാത്ര തുടര്‍ന്നു.
തിങ്കളാഴ്ച രാവിലെ 10.07ഓടെ പേടകം ചന്ദ്രന്റെ ഗുരുത്വാകര്‍ഷണ വലയത്തില്‍ പ്രവേശിച്ചു. അന്ന് ചന്ദ്രനില്‍ നിന്ന് 62,800 കിലോമീറ്റര്‍ അകലെയായിരുന്നു ഒറിയോണ്‍. ചന്ദ്രന് ഏറ്റവും അടുത്തുകൂടിയുള്ള പേടകത്തിന്റെ സഞ്ചാരം ആറുമണിക്കൂറോളം നീണ്ടുനില്‍ക്കും. കഴിഞ്ഞ ബുധനാഴ്ച ആരംഭിച്ച ഈ 10 ദിവസത്തെ പര്യവേഷണം ഏപ്രില്‍ 10-ന് അവസാനിക്കും. അന്ന് ഒറിയോണ്‍ പേടകം ശാന്തസമുദ്രത്തില്‍ തിരിച്ചിറങ്ങും. ഭാവിയില്‍ ചന്ദ്രനില്‍ മനുഷ്യവാസം സാധ്യമാക്കുന്നതിനും ചൊവ്വയിലേക്കുള്ള ദൗത്യങ്ങള്‍ക്കും അടിത്തറയിടുന്നതാണ് ആര്‍ട്ടെമിസ് ദൗത്യത്തിന്റെ ഈ വിജയം. ശാസ്ത്രലോകം ഏറെ ആകാംക്ഷയോടെയാണ് പേടകത്തിന്റെ മടക്കയാത്രയെ ഉറ്റുനോക്കുന്നത്.
