ബെംഗളൂരു: ബോളിവുഡില് റെക്കോര്ഡുകള് തകര്ത്ത് മുന്നേറുന്ന ആദിത്യ ധര് ചിത്രം ‘ധുരന്ധര് 2’ കണ്ട് വിസ്മയിച്ചിരിക്കുകയാണ് ക്രിക്കറ്റ് ഇതിഹാസം വിരാട് കോലി. ചിത്രത്തിന്റെ സംവിധായകനെയും നായകന് രണ്വീര് സിങ്ങിനെയും അഭിനന്ദിച്ചുകൊണ്ട് കോലി പങ്കുവെച്ച കുറിപ്പ് ഇതിനോടകം വൈറലായിക്കഴിഞ്ഞു. ഭാരതീയ സിനിമയില് ഇതിനുമുമ്പ് ഇത്തരമൊരു അനുഭവം തനിക്ക് ഉണ്ടായിട്ടില്ലെന്നാണ് താരം ഇന്സ്റ്റാഗ്രാമില് കുറിച്ചത്.
സിനിമ തന്നെ വൈകാരികമായി സ്പര്ശിച്ചുവെന്നും നാല് മണിക്കൂര് നീളുന്ന ചിത്രം ഒരിടത്തുപോലും വിരസത നല്കിയില്ലെന്നും കോലി പറഞ്ഞു. ‘ആദിത്യ ധര്, നിങ്ങളുടെ നിശ്ചയദാര്ഢ്യവും കഴിവും ഈ സിനിമയില് തെളിയുന്നുണ്ട്. നിങ്ങളൊരു യഥാര്ത്ഥ പ്രതിഭയാണ്. രണ്വീര് സിങ് ഈ ചിത്രത്തിലൂടെ തന്റെ പ്രകടനത്തെ മറ്റൊരു തലത്തിലേക്ക് ഉയര്ത്തിയിരിക്കുന്നു. അക്ഷരാര്ത്ഥത്തില് വൗ!’ – കോലി കുറിച്ചു.
ഡിസംബറില് പുറത്തിറങ്ങിയ ഒന്നാം ഭാഗത്തിന്റെ വന് വിജയത്തിന് പിന്നാലെ എത്തിയ ‘ധുരന്ധര് 2’ ആഗോള തലത്തില് വന് കുതിപ്പാണ് നടത്തുന്നത്. ഇതിനോടകം തന്നെ 1000 കോടി കടന്ന ചിത്രം, ആകെ 1622 കോടി രൂപയാണ് ഗ്രോസ് കളക്ഷനായി നേടിയിരിക്കുന്നത്. ബോളിവുഡ് ചിത്രങ്ങള്ക്ക് ലഭിക്കാറുള്ളതിനേക്കാള് വലിയ വരവേല്പ്പാണ് കേരളത്തിലെ തിയേറ്ററുകളിലും ഈ ചിത്രത്തിന് ലഭിച്ചുകൊണ്ടിരിക്കുന്നത്. മാര്ച്ച് 19-ന് റിലീസ് ചെയ്ത ചിത്രം ഇപ്പോഴും നിറഞ്ഞ സദസ്സില് പ്രദര്ശനം തുടരുകയാണ്. രണ്വീര് സിങ്ങിന്റെ കരിയറിലെ തന്നെ ഏറ്റവും വലിയ വിജയമായി ഈ ചിത്രം മാറിക്കഴിഞ്ഞു. വിരാട് കോലിയെപ്പോലൊരു ആഗോള കായിക താരം ചിത്രത്തെ പുകഴ്ത്തിയത് സിനിമയുടെ കുതിപ്പിന് കൂടുതല് കരുത്ത് പകരും.
