മഞ്ചേശ്വരം: കേരള നിയമസഭാ തിരഞ്ഞെടുപ്പില് എല്ഡിഎഫിനോ യുഡിഎഫിനോ കേവല ഭൂരിപക്ഷം ലഭിക്കില്ലെന്നും ബിജെപി നിര്ണ്ണായക ശക്തിയായി മാറുമെന്നും എന്ഡിഎ സ്ഥാനാര്ത്ഥിയും ബിജെപി നേതാവുമായ കെ. സുരേന്ദ്രന്. മഞ്ചേശ്വരത്ത് തന്റെ നാലാം പോരാട്ടത്തിന് ഇറങ്ങുന്ന അദ്ദേഹം ഒരു മാധ്യമത്തിന് നല്കിയ അഭിമുഖത്തിലാണ് രാഷ്ട്രീയ കേരളം ഉറ്റുനോക്കുന്ന പ്രവചനം നടത്തിയത്.
കേരളത്തിലെ ജനങ്ങള് ഇടത് സര്ക്കാരിന്റെ ഭരണത്തില് അസംതൃപ്തരാണെന്നും എന്നാല് ജനങ്ങളെ നയിക്കാന് കോണ്ഗ്രസിന് സാധിക്കുന്നില്ലെന്നും സുരേന്ദ്രന് പറഞ്ഞു. ‘യുഡിഎഫിന് കൃത്യമായ വികസന കാഴ്ചപ്പാടില്ല. കെഎസ്ആര്ടിസി നഷ്ടത്തിലായിരിക്കുമ്പോള് സ്ത്രീകള്ക്ക് സൗജന്യ യാത്ര വാഗ്ദാനം ചെയ്യുന്ന കോണ്ഗ്രസ് പ്രകടനപത്രിക അവരുടെ ദീര്ഘവീക്ഷണമില്ലായ്മയാണ് കാട്ടുന്നത്. ഇത്തവണ ഒരു മുന്നണിക്കും ഭരിക്കാനുള്ള ഭൂരിപക്ഷം കിട്ടില്ല. ആ സാഹചര്യത്തില് ബിജെപിക്ക് നിര്ണ്ണായക പങ്കുണ്ടാകും. ബിജെപിയെ പരിഗണിക്കാതെ ഒരു തീരുമാനമെടുക്കാന് ഈ മുന്നണികള്ക്ക് കഴിയില്ല,’ അദ്ദേഹം വ്യക്തമാക്കി.
സിപിഎമ്മും ബിജെപിയും തമ്മില് ധാരണയുണ്ടെന്ന യുഡിഎഫ് ആരോപണം മുസ്ലിം വോട്ടുകള് ലക്ഷ്യമിട്ടുള്ള തന്ത്രം മാത്രമാണെന്ന് സുരേന്ദ്രന് പരിഹസിച്ചു. ബിജെപി ശക്തമായ 30 മണ്ഡലങ്ങളില് പ്രധാന എതിരാളി സിപിഎമ്മാണ്. നേമം, കഴക്കൂട്ടം തുടങ്ങിയ ഇടങ്ങളില് നേരിട്ടുള്ള പോരാട്ടമാണ് നടക്കുന്നത്. യഥാര്ത്ഥത്തില് ബിജെപിയെ തോല്പ്പിക്കാന് സിപിഎമ്മും കോണ്ഗ്രസുമാണ് രഹസ്യ ധാരണയുണ്ടാക്കിയിരിക്കുന്നതെന്ന് അദ്ദേഹം ആരോപിച്ചു.
വികസനം ചര്ച്ചയാകുന്ന ഇടങ്ങളില് ബിജെപി വലിയ നേട്ടമുണ്ടാക്കും. തിരുവനന്തപുരം കോര്പ്പറേഷനിലും തൃശൂര് ലോക്സഭാ സീറ്റിലും ബിജെപി നേടിയ വിജയം ഇതിന് തെളിവാണ്. ശബരിമല സ്വര്ണ്ണ മോഷണം പോയ വിഷയം പ്രചാരണത്തില് ബിജെപി ശക്തമായി ഉയര്ത്തുന്നുണ്ട്. പ്രധാനമന്ത്രി ഇത് നേരത്തെ തന്നെ ചൂണ്ടിക്കാട്ടിയതാണ്. ഇത് ഒരു ക്ഷേത്രത്തിന്റെ മാത്രം പ്രശ്നമല്ല, പലയിടത്തും സമാനമായ അഴിമതികള് നടക്കുന്നു. മുസ്ലിം വിഭാഗങ്ങള്ക്കിടയില് ബിജെപിയെക്കുറിച്ചുള്ള ഭീതി മാറി. മോദി സര്ക്കാര് തങ്ങള്ക്ക് എതിരല്ലെന്ന് അവര് തിരിച്ചറിഞ്ഞു.
ഹജ്ജ് തീര്ത്ഥാടനത്തില് കൊണ്ടുവന്ന സുതാര്യതയും വിവേചനമില്ലാത്ത വികസനവും സമുദായത്തെ ബിജെപിയോട് അടുപ്പിച്ചു. ക്രിസ്ത്യന് വിഭാഗങ്ങള്ക്കിടയിലും ബിജെപിക്ക് വലിയ സ്വീകാര്യതയാണ് ലഭിക്കുന്നത്. കഴിഞ്ഞ തവണത്തെ ചെറിയ വോട്ടിന്റെ പരാജയങ്ങള് ഇത്തവണ മഞ്ചേശ്വരത്ത് വലിയ വിജയമായി മാറുമെന്നും കേരളം മുഴുവന് ഒരു മാറ്റത്തിനായി എന്ഡിഎയെ ഉറ്റുനോക്കുകയാണെന്നും കെ. സുരേന്ദ്രന് ആത്മവിശ്വാസം പ്രകടിപ്പിച്ചു. വോട്ടെടുപ്പ് പൂര്ത്തിയാകുമ്പോള് കേരള രാഷ്ട്രീയത്തിന്റെ ഗതി മാറ്റുന്ന ശക്തിയായി എന്ഡിഎ മാറുമെന്നും അദ്ദേഹം കൂട്ടിച്ചേര്ത്തു.
