പശ്ചിമ ബംഗാള്‍: പശ്ചിമ ബംഗാളിലെ സാമ്പത്തിക കെടുകാര്യസ്ഥതയ്‌ക്കും തകര്‍ന്ന ക്രമസമാധാന നിലയ്‌ക്കുമെതിരെ തൃണമൂല്‍ കോണ്‍ഗ്രസിനെ രൂക്ഷമായി വിമര്‍ശിച്ച് പ്രധാനമന്ത്രി നരേന്ദ്ര മോദി. ഏപ്രില്‍ 23-ന് വോട്ടെടുപ്പ് നടക്കാനിരിക്കുന്ന ഹാല്‍ദിയയില്‍ സംഘടിപ്പിച്ച തിരഞ്ഞെടുപ്പ് റാലിയില്‍ സംസാരിക്കവെ, ബംഗാളിലെ ജനങ്ങള്‍ക്കായി ആറ് ഉറപ്പുകളാണ് പ്രധാനമന്ത്രി പ്രഖ്യാപിച്ചത്.
ബംഗാളില്‍ ബിജെപി അധികാരത്തില്‍ വന്നാല്‍ സംസ്ഥാനത്ത് നിയമവാഴ്ച പുനഃസ്ഥാപിക്കും. ഭരണത്തില്‍ സുതാര്യത കൊണ്ടുവരും. എല്ലാ അഴിമതി കേസുകളിലും സമഗ്രമായ അന്വേഷണം നടത്തും. അനധികൃത കുടിയേറ്റക്കാരെ പുറത്താക്കും. സര്‍ക്കാര്‍ ജീവനക്കാര്‍ക്കായി ഏഴാം ശമ്പള കമ്മീഷന്‍ നടപ്പിലാക്കും. അര്‍ഹമായ ആനുകൂല്യങ്ങള്‍ എല്ലാവരിലും എത്തിക്കും എന്നീ ഉറപ്പുകളാണ് അദ്ദേഹം ബംഗാളിലെ ജനങ്ങള്‍ക്ക് നല്‍കിയത്.
കഴിഞ്ഞ 15 വര്‍ഷത്തിനിടയില്‍ വികസനത്തിന്റെ എല്ലാ മാനദണ്ഡങ്ങളിലും ബംഗാള്‍ പിന്നോട്ട് പോയെന്ന് മോദി ആരോപിച്ചു. ‘ഒരുകാലത്ത് ഇന്ത്യയിലെ പ്രധാന വ്യവസായ കേന്ദ്രമായിരുന്ന ഹാല്‍ദിയയിലെ ഫാക്ടറികള്‍ ഇന്ന് പൂട്ടിക്കിടക്കുകയാണ്. തൊഴില്‍ തേടി ആളുകള്‍ ഇവിടേക്ക് വന്നിരുന്ന കാലം മാറി, ഇന്ന് ബംഗാളിലെ യുവാക്കള്‍ മറ്റു സംസ്ഥാനങ്ങളിലേക്ക് കുടിയേറുകയാണ്,’ അദ്ദേഹം പറഞ്ഞു.
ബംഗാളിലെ യുവാക്കളുടെ തൊഴില്‍ തട്ടിയെടുത്ത് കുടിയേറ്റക്കാര്‍ക്ക് നല്‍കുന്ന രീതി അവസാനിപ്പിക്കുമെന്നും, സംസ്ഥാനത്തിന്റെ സമ്പദ്വ്യവസ്ഥയെ തിരികെ കൊണ്ടുവരാന്‍ ‘ഡബിള്‍ എഞ്ചിന്‍’ സര്‍ക്കാര്‍ അത്യാവശ്യമാണെന്നും അദ്ദേഹം കൂട്ടിച്ചേര്‍ത്തു. മമത ബാനര്‍ജി സര്‍ക്കാരിന് കീഴില്‍ സംസ്ഥാനത്തെ മത്സ്യ ഉല്‍പ്പാദനം കുത്തനെ ഇടിഞ്ഞതായി പ്രധാനമന്ത്രി ചൂണ്ടിക്കാട്ടി. ബിജെപി അധികാരത്തില്‍ വന്നാല്‍ മാംസവും മത്സ്യവും നിരോധിക്കുമെന്ന തൃണമൂലിന്റെ പ്രചാരണത്തിനിടയിലാണ് മോദിയുടെ ഈ മറുപടി.
മറ്റ് സംസ്ഥാനങ്ങളില്‍ മത്സ്യ ഉല്‍പ്പാദനം ഇരട്ടിയായപ്പോള്‍ ബംഗാള്‍ പുറത്തുനിന്ന് മത്സ്യം വാങ്ങേണ്ട അവസ്ഥയിലാണെന്ന് അദ്ദേഹം പരിഹസിച്ചു. ‘പിഎം’ എന്ന് പേരുള്ളതിനാല്‍ ‘പിഎം മത്സ്യ യോജന’ പദ്ധതി ബംഗാളില്‍ നടപ്പിലാക്കാന്‍ തൃണമൂല്‍ തയ്യാറായില്ലെന്നും അദ്ദേഹം ആരോപിച്ചു. ബംഗാളില്‍ കമ്മീഷന്‍ നല്‍കാതെ ഒന്നും നടക്കില്ലെന്നും തൃണമൂല്‍ നടത്തുന്നത് ഒരു അഴിമതി സിന്‍ഡിക്കേറ്റാണെന്നും മോദി ആരോപിച്ചു. ‘ഓരോ അഴിമതിക്കും കണക്ക് ചോദിക്കും (സബ്കാ ഹിസാബ് ഹോഗാ),’ എന്ന് അദ്ദേഹം മുന്നറിയിപ്പ് നല്‍കി.
സംസ്ഥാനത്ത് വര്‍ദ്ധിച്ചുവരുന്ന ബലാത്സംഗക്കേസുകളെക്കുറിച്ച് പരാമര്‍ശിച്ച പ്രധാനമന്ത്രി, ബംഗാളിലെ പെണ്‍മക്കള്‍ക്ക് ഇന്ന് സുരക്ഷിതത്വമില്ലെന്ന് പറഞ്ഞു. ബിജെപി അധികാരത്തില്‍ വന്നാല്‍ ഇരകള്‍ക്ക് നീതി ഉറപ്പാക്കുമെന്നും ക്രമസമാധാനം വീണ്ടെടുക്കുമെന്നും അദ്ദേഹം വാഗ്ദാനം ചെയ്തു. വടക്കന്‍ ബംഗാളില്‍ ഏപ്രില്‍ 23-ന് നടക്കുന്ന ഒന്നാം ഘട്ട വോട്ടെടുപ്പിന് മുന്നോടിയായി ഈ ആഴ്ച ഏഴ് വമ്പന്‍ റാലികളിലാണ് പ്രധാനമന്ത്രി പങ്കെടുക്കുന്നത്.
