തിരുവനന്തപുരം: ഈ വര്ഷത്തെ കാലവര്ഷം (ജൂണ് – സെപ്റ്റംബര്) കേരളത്തില് സാധാരണ നിലയിലായിരിക്കുമെന്ന് സ്വകാര്യ കാലാവസ്ഥാ ഏജന്സിയായ സ്കൈമെറ്റ് പ്രവചിച്ചു. എന്നാല് ദേശീയതലത്തില് മഴയുടെ അളവ് ശരാശരിയിലും കുറയാന് സാധ്യതയുണ്ടെന്നാണ് പ്രാഥമിക വിലയിരുത്തല്. പസഫിക് സമുദ്രോപരിതലം അസാധാരണമായി ചൂടാകുന്ന ‘എല്നിനോ’ പ്രതിഭാസം ഇത്തവണ കാലവര്ഷത്തിന്റെ ആദ്യഘട്ടത്തില് പ്രകടമായേക്കാം.
അന്താരാഷ്ട്ര ഏജന്സികളുടെ റിപ്പോര്ട്ടുകള് പ്രകാരം ഇത് തീക്ഷ്ണമായ ‘സൂപ്പര് എല്നിനോ’ ആയി മാറാന് സാധ്യതയുണ്ട്. ഇത് സംഭവിക്കുകയാണെങ്കില്, കാലവര്ഷത്തിന്റെ രണ്ടാം പകുതിയില് മഴയുടെ അളവ് ഗണ്യമായി കുറയാന് കാരണമാകും. രാജ്യത്താകെ മഴ കുറയാന് സാധ്യതയുണ്ടെങ്കിലും കേരളത്തിന് ആശ്വാസമാകുന്നത് ഇന്ത്യന് മഹാസമുദ്രത്തിലെ ‘ഡൈപോള്’ പ്രതിഭാസമാണ്. നിലവില് ഇത് പോസിറ്റീവ് ആകാനാണ് സാധ്യത. അതായത് സമുദ്രത്തിന്റെ പടിഞ്ഞാറന് മേഖലയില് ചൂട് കൂടുകയും കിഴക്കന് മേഖലയില് കുറയുകയും ചെയ്യും.
ഈ മാറ്റം കാലവര്ഷത്തിന്റെ തുടക്കത്തില് കേരളം ഉള്പ്പെടെയുള്ള തീരദേശ മേഖലകളില് മികച്ച മഴ ലഭിക്കാന് സഹായിക്കും. ജൂണ് മുതല് സെപ്റ്റംബര് വരെയുള്ള മാസങ്ങളിലെ മഴയെക്കുറിച്ചുള്ള ആദ്യഘട്ട നിരീക്ഷണമാണിത്. വരും ദിവസങ്ങളില് സമുദ്രത്തിലെ താപനിലയിലുണ്ടാകുന്ന മാറ്റങ്ങള്ക്കനുസരിച്ച് പ്രവചനങ്ങളില് വ്യത്യാസം വന്നേക്കാം. കേന്ദ്ര കാലാവസ്ഥാ വകുപ്പിന്റെ ഔദ്യോഗിക പ്രവചനം ഉടന് പുറത്തുവരുമെന്നാണ് പ്രതീക്ഷിക്കുന്നത്.
