തിരുവനന്തപുരം: നിയമസഭാ തിരഞ്ഞെടുപ്പിന് പിന്നാലെ കേരളത്തില് വലിയ രാഷ്ട്രീയ മാറ്റമുണ്ടാകുമെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. സംസ്ഥാനത്ത് എന്ഡിഎ മുന്നണി വലിയ മുന്നേറ്റം നടത്തുമെന്നും വരാനിരിക്കുന്ന ഫലം അത് തെളിയിക്കുമെന്നും അദ്ദേഹം പറഞ്ഞു. നേമം മണ്ഡലത്തില് ബിജെപിക്ക് വലിയ വിജയപ്രതീക്ഷയുണ്ട്. ഇവിടുത്തെ വോട്ടര്മാര് എന്ഡിഎയില് അര്പ്പിച്ച വിശ്വാസം വിജയത്തിലെത്തുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
കേരള രാഷ്ട്രീയത്തില് ഇനി എന്ഡിഎയെ അവഗണിച്ച് മുന്നോട്ട് പോകാനാകില്ല. വരും കാലങ്ങളില് ഒരു വശത്ത് എന്ഡിഎയും മറുവശത്ത് കോണ്ഗ്രസ്-സിപിഎം സഖ്യവും തമ്മിലുള്ള നേരിട്ടുള്ള പോരാട്ടമായിരിക്കും കേരളത്തില് നടക്കാന് പോകുന്നത്. പതിവ് മുന്നണി രാഷ്ട്രീയത്തില് നിന്ന് മാറി ഒരു പുതിയ മാറ്റത്തിന് കേരളം തയ്യാറെടുക്കുകയാണെന്നും അദ്ദേഹം കൂട്ടിച്ചേര്ത്തു.
വോട്ടെടുപ്പ് പൂര്ത്തിയായി കൃത്യമായ വിശകലനങ്ങള് പുറത്തുവരുന്ന സാഹചര്യത്തിലാണ് മുന്നണിയുടെ പ്രകടനത്തില് ഉറച്ച വിശ്വാസവുമായി ബിജെപി അധ്യക്ഷന് രംഗത്തെത്തിയത്. എന്ഡിഎയുടെ വളര്ച്ച കേരളത്തിലെ പരമ്പരാഗത രാഷ്ട്രീയ സമവാക്യങ്ങളെ പൊളിച്ചെഴുതുമെന്നും അദ്ദേഹം അവകാശപ്പെട്ടു.
