ശ്രീഹരിക്കോട്ട: ഇന്ത്യയുടെ പ്രഥമ മനുഷ്യ ബഹിരാകാശ ദൗത്യമായ ഗഗന്‍യാന്റെ ഭാഗമായുള്ള രണ്ടാമത്തെ സംയോജിത എയര്‍ ഡ്രോപ്പ് ടെസ്റ്റ് ഐഎസ്ആര്‍ഒ വിജയകരമായി പൂര്‍ത്തിയാക്കി. ഏപ്രില്‍ 10-ന് ശ്രീഹരിക്കോട്ടയിലെ സതീഷ് ധവാന്‍ ബഹിരാകാശ കേന്ദ്രത്തില്‍ വെച്ചായിരുന്നു പരീക്ഷണം നടന്നത്. ബഹിരാകാശ സഞ്ചാരികള്‍ ഇരിക്കുന്ന ‘ക്രൂ മോഡ്യൂള്‍’ ഭൂമിയിലേക്ക് തിരികെ ഇറങ്ങുന്ന വേളയില്‍ സുരക്ഷിതമായി ലാന്‍ഡ് ചെയ്യുന്നുവെന്ന് ഉറപ്പാക്കുന്നതിനുള്ള സാങ്കേതികവിദ്യയാണ് ഈ പരീക്ഷണത്തിലൂടെ വിലയിരുത്തിയത്.
ബഹിരാകാശ ദൗത്യത്തിന്റെ അവസാന ഘട്ടത്തില്‍ പേടകം സുരക്ഷിതമായി കടലിലോ കരയിലോ ഇറങ്ങുന്നതിന് ഈ സംവിധാനം അത്യന്താപേക്ഷിതമാണ്. കേന്ദ്ര ശാസ്ത്ര സാങ്കേതിക മന്ത്രാലയം സഹമന്ത്രി ഡോ. ജിതേന്ദ്ര സിംഗ് എക്സിലൂടെയാണ് ഈ നേട്ടം ഔദ്യോഗികമായി പ്രഖ്യാപിച്ചത്. ‘ഗഗന്‍യാന്‍ ദൗത്യത്തിന്റെ രണ്ടാമത്തെ ഇന്റഗ്രേറ്റഡ് എയര്‍ ഡ്രോപ്പ് ടെസ്റ്റ് വിജയകരമായി പൂര്‍ത്തിയാക്കിയ ഐഎസ്ആര്‍ഒയ്‌ക്ക് അഭിനന്ദനങ്ങള്‍. അടുത്ത വര്‍ഷം നടക്കാനിരിക്കുന്ന ഇന്ത്യയുടെ ആദ്യ മനുഷ്യ ബഹിരാകാശ ദൗത്യത്തിലേക്കുള്ള നിര്‍ണ്ണായകമായ ഒരു നാഴികക്കല്ലാണിത്,’ അദ്ദേഹം കുറിച്ചു.
2025 ഓഗസ്റ്റ് 24-നായിരുന്നു ഗഗന്‍യാന്‍ ദൗത്യത്തിന്റെ ആദ്യ എയര്‍ ഡ്രോപ്പ് പരീക്ഷണം നടന്നത്. അതിന്റെ തുടര്‍ച്ചയായി നടന്ന ഈ രണ്ടാം പരീക്ഷണവും വിജയമായതോടെ ഗഗന്‍യാന്‍ ദൗത്യം അതിന്റെ സജ്ജീകരണങ്ങളുടെ അവസാന ഘട്ടത്തിലേക്ക് കടക്കുകയാണെന്ന് ഐഎസ്ആര്‍ഒ വ്യക്തമാക്കി. അടുത്ത വര്‍ഷം നടക്കാനിരിക്കുന്ന വിക്ഷേപണത്തിന് മുന്നോടിയായി കൂടുതല്‍ സുരക്ഷാ പരിശോധനകള്‍ വരും ദിവസങ്ങളില്‍ നടക്കും.
