വെള്ളറട: ക്ഷേത്ര ഓഫീസ് കുത്തിത്തുറന്ന് മോഷണത്തിനെത്തിയ ആൾ അകത്തിരുന്ന് ഉറങ്ങിപ്പോയി. തിരുവനന്തപുരം വെള്ളറടയിലെ കുടപ്പനമൂട് ഭഗവതി ക്ഷേത്രത്തിലാണ് ഈ സംഭവം നടന്നത്. സംഭവത്തിൽ തമിഴ്നാട് സ്വദേശിയായ നാല്പതുകാരനെ വെള്ളറട പോലീസ് അറസ്റ്റ് ചെയ്തു.
കഴിഞ്ഞ ദിവസം രാത്രിയായിരുന്നു കേസിനാസ്പദമായ സംഭവം. ക്ഷേത്ര കമ്മിറ്റി ഓഫീസിന്റെ വാതിൽ കുത്തിത്തുറന്നാണ് മോഷ്ടാവ് അകത്തുകയറിയത്. എന്നാൽ അകത്തെത്തിയ ഇയാൾ കടുത്ത ക്ഷീണം കാരണം അവിടെത്തന്നെ കിടന്നുറങ്ങുകയായിരുന്നു.
രാവിലെ ക്ഷേത്രത്തിലെത്തിയ ഭാരവാഹികൾ ഓഫീസിന്റെ വാതിൽ തകർക്കപ്പെട്ട നിലയിൽ കാണുകയും തുടർന്ന് നടത്തിയ പരിശോധനയിൽ മോഷ്ടാവിനെ അകത്ത് ഉറങ്ങുന്ന നിലയിൽ കണ്ടെത്തുകയുമായിരുന്നു. ഉടൻ തന്നെ വെള്ളറട പോലീസിനെ വിവരമറിയിച്ചു.
വിവരമറിഞ്ഞെത്തിയ പോലീസ് സംഘം ഇയാളെ കസ്റ്റഡിയിലെടുത്തു. മോഷണശ്രമത്തിനിടെ എന്തിന് ഉറങ്ങിപ്പോയി എന്ന ചോദ്യത്തിന് “കടുത്ത ക്ഷീണം കാരണമാണ് ഉറങ്ങിയത്” എന്നായിരുന്നു ഇയാൾ പോലീസിന് നൽകിയ മറുപടി.
