ബക്‌സര്‍ (ബീഹാര്‍): പ്രധാനമന്ത്രി നരേന്ദ്ര മോദിയുടെ സുരക്ഷയില്‍ വിട്ടുവീഴ്ച ചെയ്യാമെന്നും പകരം പണം വേണമെന്നും ആവശ്യപ്പെട്ട് വിദേശ രഹസ്യാന്വേഷണ ഏജന്‍സിക്ക് സന്ദേശമയച്ച യുവാവ് ബീഹാറിലെ ബക്‌സര്‍ ജില്ലയില്‍ പിടിയില്‍. സിംരി സ്വദേശിയായ അമല്‍ കുമാര്‍ തിവാരിയാണ് അറസ്റ്റിലായതെന്ന് പോലീസ് അറിയിച്ചു. കഴിഞ്ഞ ദിവസമാണ് ഇത് സംബന്ധിച്ച വിവരങ്ങള്‍ പുറത്തുവിട്ടത്. വിവരങ്ങള്‍ വന്ന ഉടന്‍ തന്നെ പോലീസ് ഇയാളെ അറസ്റ്റ് ചെയ്തിരുന്നു. ഇയാളുടെ പക്കല്‍ നിന്ന് ലാപ്ടോപ്പ്, മൊബൈല്‍ ഫോണുകള്‍, മറ്റ് ഡിജിറ്റല്‍ തെളിവുകള്‍ എന്നിവ പോലീസ് പിടിച്ചെടുത്തിട്ടുണ്ട്.
അമേരിക്ക ആസ്ഥാനമായുള്ള ഒരു രഹസ്യാന്വേഷണ ഏജന്‍സിയുടെ വെബ്സൈറ്റിലാണ് തിവാരി സന്ദേശം പോസ്റ്റ് ചെയ്തത്. ഇന്ത്യന്‍ പ്രധാനമന്ത്രിയുടെ സുരക്ഷാ വിവരങ്ങള്‍ നല്‍കാമെന്നും പകരം പണം വേണമെന്നുമാണ് ഇയാള്‍ ആവശ്യപ്പെട്ടതെന്ന് ബക്‌സര്‍ പോലീസ് പ്രസ്താവനയില്‍ പറഞ്ഞു. ഇയാളുടെ ഫോണില്‍ നിന്ന് ഒന്നിലധികം വിപിഎന്‍ സോഫ്റ്റ്വെയറുകളും ‘ഡാര്‍ക്ക് വെബ്’ ആക്‌സസ് ചെയ്യാനുള്ള പ്രത്യേക ആപ്പുകളും കണ്ടെത്തി. ഇന്റര്‍നെറ്റിലെ സാധാരണ സെര്‍ച്ച് എന്‍ജിനുകള്‍ക്ക് കണ്ടെത്താന്‍ കഴിയാത്ത ഇടമാണ് ഡാര്‍ക്ക് വെബ്.
സൈബര്‍ കുറ്റകൃത്യങ്ങള്‍ക്കായി ഉപയോഗിക്കുന്ന നിരവധി വ്യാജ തിരിച്ചറിയല്‍ രേഖകളും ഇയാളുടെ പക്കല്‍ നിന്ന് പോലീസ് കണ്ടെടുത്തു. ചോദ്യം ചെയ്യലില്‍ താന്‍ ചെയ്ത കുറ്റം തിവാരി സമ്മതിച്ചതായി പോലീസ് പറഞ്ഞു. മുന്‍പ് കൊല്‍ക്കത്ത വിമാനത്താവളത്തിന്റെ വെബ്സൈറ്റ് ഹാക്ക് ചെയ്യുമെന്ന് ഭീഷണിപ്പെടുത്തിയ കേസിലും ഇയാള്‍ പ്രതിയാണെന്ന് അന്വേഷണത്തില്‍ വ്യക്തമായി. നിലവില്‍ ബീഹാര്‍ പോലീസും കേന്ദ്ര ഏജന്‍സികളും ഇയാളെ വിശദമായി ചോദ്യം ചെയ്തുവരികയാണ്.
