രാഷ്‌ട്രീയത്തിനപ്പുറം കൈകോര്‍ത്ത് മോദിയും രാഹുലും; ‘ജനാധിപത്യത്തിന്റെ സൗന്ദര്യം’ എന്ന് ആളുകള്‍; ചര്‍ച്ചയായി വീഡിയോ

ന്യൂഡല്‍ഹി: രാഷ്‌ട്രീയ ചതുരംഗക്കളത്തില്‍ ഇരുധ്രുവങ്ങളിലായി നിലയുറപ്പിക്കുന്ന നരേന്ദ്ര മോദിയും രാഹുല്‍ ഗാന്ധിയും കഴിഞ്ഞ ദിവസം പാര്‍ലമെന്റ് അങ്കണത്തില്‍ കണ്ടുമുട്ടിയപ്പോള്‍ കണ്ടത് ഭരണ-പ്രതിപക്ഷ വൈരത്തിനപ്പുറമുള്ള ഒരു മാനുഷിക മുഖമാണ്. പാര്‍ലമെന്റ് വളപ്പില്‍ പരസ്പരം കണ്ടുമുട്ടിയ ഇരുവരും അല്‍പ്പനേരം ഹൃദ്യമായി സംസാരിച്ചു നിന്നത് കണ്ടുനിന്നവരിലും സോഷ്യല്‍ മീഡിയയിലും കൗതുകം പടര്‍ത്തിയിരിക്കുകയാണ്.

മഹാത്മ ജ്യോതിറാവു ഫൂലെയുടെ 200-ാം ജന്മവാര്‍ഷികത്തോടനുബന്ധിച്ച് പാര്‍ലമെന്റിലെ ‘പ്രേരണാ സ്ഥലില്‍’ ആദരവര്‍പ്പിക്കാന്‍ എത്തിയതായിരുന്നു പ്രധാനമന്ത്രിയും പ്രതിപക്ഷ നേതാവും. ഔദ്യോഗിക ചടങ്ങുകളുടെ തിരക്കിനിടയില്‍ തന്റെ കാറില്‍ നിന്നിറങ്ങിയ നരേന്ദ്ര മോദി, അവിടെയുണ്ടായിരുന്ന രാഹുല്‍ ഗാന്ധിക്കരികിലേക്ക് എത്തുകയായിരുന്നു. പിന്നീട് കണ്ടത് വളരെ അടുത്തുനിന്ന് ഇരുവരും ഗൗരവത്തോടെയും എന്നാല്‍ സൗഹൃദത്തോടെയും സംസാരിക്കുന്ന കാഴ്ചയാണ്.

തിരക്കേറിയ പാര്‍ലമെന്റ് വളപ്പില്‍ നേതാക്കള്‍ക്കിടയിലെ ഈ സ്വകാര്യ സംഭാഷണം കണ്ടുനിന്ന കേന്ദ്രമന്ത്രിമാരും സ്പീക്കറും അല്‍പ്പനേരം സ്തബ്ധരായി നിന്നുപോയി. ചാനല്‍ ക്യാമറകള്‍ക്ക് മുന്നില്‍ പരസ്പരം പോരടിക്കുന്ന രണ്ട് നേതാക്കള്‍, തിരശ്ശീലയ്‌ക്ക് പിന്നില്‍ ജനാധിപത്യപരമായ മാന്യത പുലര്‍ത്തുന്നത് രാഷ്‌ട്രീയത്തിനപ്പുറം ഒരു നല്ല കാഴ്ചയായി മാറി. ഈ കൂടിക്കാഴ്ചയുടെ ദൃശ്യങ്ങള്‍ മിനിറ്റുകള്‍ക്കുള്ളിലാണ് ഇന്റര്‍നെറ്റില്‍ വൈറലായത്. ‘ജനാധിപത്യത്തിന്റെ സൗന്ദര്യം’ എന്നാണ് പലരും ഇതിനെ വിശേഷിപ്പിച്ചത്.

#WATCH | Delhi: Prime Minister Narendra Modi arrives at Prerna Sthal on the Parliament premises to pay a floral tribute to Mahatma Jyotiba Phule on his 200th birth anniversary today.

Lok Sabha Speaker Om Birla, Lok Sabha LoP Rahul Gandhi, Union Minister Arjun Ram Meghwal, former… pic.twitter.com/QexqUVky1Z

— ANI (@ANI) April 11, 2026 

ജ്യോതിറാവു ഫൂലെയുടെ സ്മരണ പുതുക്കുന്ന വേളയില്‍ തന്നെ ഇത്തരമൊരു സംഗമം നടന്നത് പ്രതീകാത്മകമായി. ‘രാഷ്‌ട്രീയ അഭിപ്രായ വ്യത്യാസങ്ങള്‍ ഉണ്ടാകാം, പക്ഷേ രാജ്യത്തെ നയിക്കുന്നവര്‍ തമ്മില്‍ ഇത്തരം ആരോഗ്യകരമായ ആശയവിനിമയങ്ങള്‍ ഉണ്ടാകുന്നത് സന്തോഷകരമാണ്’ എന്നാണ് എക്സില്‍ (ട്വിറ്റര്‍) ഉയര്‍ന്നുവന്ന പൊതുവികാരം. രാജ്യത്തെ പ്രധാനമന്ത്രിയും പ്രതിപക്ഷ നേതാവും തമ്മിലുള്ള ഈ ഹൃദയസ്പര്‍ശിയായ നിമിഷം, ആശയപരമായ പോരാട്ടങ്ങള്‍ക്കിടയിലും മാനുഷിക ബന്ധങ്ങള്‍ നിലനില്‍ക്കുന്നു എന്ന വലിയ സന്ദേശമാണ് നല്‍കുന്നത്.