കൊച്ചി: കണിക്കൊന്നയും കൈനീട്ടവുമായി വിഷുവിനെ വരവേല്ക്കാന് ഒരുങ്ങുന്ന കൊച്ചിയില് ജനജീവിതം തിരക്കിലമര്ന്നു. അവസാന നിമിഷത്തെ ഷോപ്പിംഗിനായി തെരുവിലിറങ്ങിയവരും അവധി ആഘോഷിക്കാന് നാട്ടിലേക്ക് മടങ്ങുന്നവരും ചേര്ന്നതോടെ നഗരത്തിലെ പ്രധാന പാതകളെല്ലാം വാഹനങ്ങളാല് നിറഞ്ഞു. കനത്ത ട്രാഫിക് നിയന്ത്രിക്കാന് പോലീസ് പെടാപ്പാട് പെടുകയാണ്.
നഗരത്തിലെ വ്യാപാര കേന്ദ്രങ്ങളായ ബ്രോഡ്വേ, എം.ജി റോഡ് എന്നിവിടങ്ങളില് കാലുകുത്താന് ഇടമില്ലാത്ത വിധം തിരക്കാണ്. ഇടപ്പള്ളിയിലെയും മറ്റും വന്കിട മാളുകള്ക്ക് മുന്നില് വാഹനങ്ങളുടെ നീണ്ട നിര തന്നെ ദൃശ്യമാണ്. പാലാരിവട്ടം, വൈറ്റില തുടങ്ങിയ ജംങ്ഷനുകളിലും വിഷു വിപണി സജീവമായതോടെ കാല്നടയാത്ര പോലും ദുഷ്കരമായി. നഗരത്തിന് പുറത്തേക്ക് പോകുന്ന യാത്രക്കാരുടെ ബാഹുല്യം ദേശീയപാതകളെ നിശ്ചലമാക്കിയിട്ടുണ്ട്.
ഇടപ്പള്ളി മുതല് ആലുവയും കടന്ന് അങ്കമാലി വരെ വടക്കന് കേരളത്തിലേക്ക് പോകുന്ന വാഹനങ്ങളുടെ നീണ്ട നിരയാണ്. ആലുവ മണപ്പുറം, കെ.എസ്.ആര്.ടി.സി പരിസരം എന്നിവിടങ്ങളില് കനത്ത ബ്ലോക്കാണ് ഉള്ളത്. വൈറ്റില – കുണ്ടന്നൂര് മേഖലയില് ആലപ്പുഴ, തിരുവനന്തപുരം ഭാഗങ്ങളിലേക്കുള്ള വാഹനങ്ങള് ഇഴഞ്ഞു നീങ്ങുകയാണ്. അരൂര് ഭാഗത്തുനിന്ന് നഗരത്തിലേക്കും തിരക്കുണ്ടെങ്കിലും ഗതാഗതം പൂര്ണ്ണമായും തടസ്സപ്പെട്ടിട്ടില്ല. സഹോദരന് അയ്യപ്പന് റോഡ് വഴി തൃപ്പൂണിത്തുറ ഭാഗത്തേക്കും പേട്ട-സ്റ്റാച്യൂ ജംങ്ഷനിലും ഷോപ്പിംഗ് തിരക്ക് മൂലം യാത്ര തടസ്സപ്പെടുന്നു.
റെയില്വേ സ്റ്റേഷനുകളിലും ബസ് സ്റ്റാന്ഡുകളിലും യാത്രക്കാരുടെ അഭൂതപൂര്വ്വമായ തിരക്കാണ് അനുഭവപ്പെടുന്നത്. കണ്ടെയ്നര് റോഡ്, വരാപ്പുഴ പാലം, പറവൂര് ടൗണ് എന്നിവിടങ്ങളിലും ഗതാഗതക്കുരുക്ക് രൂക്ഷമാണ്. ട്രാഫിക് സിഗ്നലുകളില് മിനിറ്റുകളോളം കാത്തുനില്ക്കേണ്ട അവസ്ഥയിലാണ് ഡ്രൈവര്മാര്. രാത്രി വൈകിയും തിരക്ക് തുടരാനാണ് സാധ്യതയെന്ന് അധികൃതര് അറിയിച്ചു.
