തൃശൂര്‍: തൃശൂരിലെ തിരൂരില്‍ വാടകമുറിയില്‍ താമസിച്ചിരുന്ന തൊഴിലാളിയെ തലയ്‌ക്ക് പിന്നില്‍ മാരകമായി പരിക്കേറ്റ് മരിച്ച നിലയില്‍ കണ്ടെത്തി. തൃപ്രങ്ങോട് സ്വദേശി മുഹമ്മദ് ഷാഫിയാണ് (38) കൊല്ലപ്പെട്ടത്. സംഭവവുമായി ബന്ധപ്പെട്ട് ഒപ്പം താമസിച്ചിരുന്ന പശ്ചിമ ബംഗാള്‍ സ്വദേശി താരിഫുള്‍ ഹഖിനെ പോലീസ് അറസ്റ്റ് ചെയ്തു.
തിരൂരിലെ ഒരു വാടകവീട്ടിലായിരുന്നു ഷാഫിയും താരിഫുളും താമസിച്ചിരുന്നത്. ഇന്ന് രാവിലെ കെട്ടിട ഉടമ മുറി പരിശോധിക്കാനെത്തിയപ്പോഴാണ് രക്തം തളംകെട്ടിക്കിടക്കുന്ന നിലയില്‍ ഷാഫിയുടെ മൃതദേഹം കണ്ടത്. ഉടമയെ കണ്ടയുടന്‍ മുറിയിലുണ്ടായിരുന്ന താരിഫുള്‍ ഹഖ് പരിഭ്രാന്തനായി പുറത്തേക്ക് ഓടി രക്ഷപ്പെടാന്‍ ശ്രമിക്കുകയായിരുന്നു. ഇതോടെയാണ് കൊലപാതകമാണെന്ന സംശയം ബലപ്പെട്ടത്.
കെട്ടിട ഉടമ ഉടന്‍ തന്നെ വിവരം പോലീസിനെ അറിയിച്ചു. തുടര്‍ന്ന് തൃശൂര്‍ സിറ്റി പോലീസിന്റെ നേതൃത്വത്തില്‍ നടത്തിയ ദ്രുതഗതിയിലുള്ള അന്വേഷണത്തിലാണ് പ്രതിയെ സമീപപ്രദേശത്തുനിന്നുതന്നെ വലയിലാക്കിയത്. ഷാഫിയുടെ തലയുടെ പിന്‍ഭാഗത്ത് ഭാരമേറിയ വസ്തു കൊണ്ട് അടിയേറ്റ നിലയിലാണ്. മുറിയില്‍ രക്തം കട്ടപിടിച്ചു കിടക്കുന്നുണ്ടായിരുന്നു. ചൊവ്വാഴ്ച രാത്രിയോടെയാകാം കൊലപാതകം നടന്നതെന്നാണ് പോലീസിന്റെ പ്രാഥമിക നിഗമനം.
പ്രതിയായ താരിഫുള്‍ ഹഖിനെ പോലീസ് വിശദമായി ചോദ്യം ചെയ്തുവരികയാണ്. ഇരുവരും തമ്മിലുണ്ടായ പെട്ടെന്നുള്ള തര്‍ക്കമാണോ അതോ മുന്‍വൈരാഗ്യമാണോ കൊലപാതകത്തിന് പിന്നിലെന്ന് കണ്ടെത്താനുള്ള ശ്രമത്തിലാണ് അന്വേഷണസംഘം. വിരലടയാള വിദഗ്ധരും സയന്റിഫിക് ഉദ്യോഗസ്ഥരും സ്ഥലത്തെത്തി തെളിവുകള്‍ ശേഖരിച്ചു. ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം പോസ്റ്റ്മോര്‍ട്ടത്തിനായി മെഡിക്കല്‍ കോളേജ് ആശുപത്രിയിലേക്ക് മാറ്റി.
