കണ്ണൂര്‍: അഞ്ചരക്കണ്ടി ഡെന്റല്‍ കോളേജ് വിദ്യാര്‍ത്ഥി നിതിന്‍ രാജിന്റെ ആത്മഹത്യയ്‌ക്ക് കാരണക്കാരനെന്ന് ആരോപിക്കപ്പെടുന്ന ഡോ. എം.കെ. റാമിനെ കോളേജ് ഭരണകൂടം സ്ഥാനത്ത് നിന്ന് നീക്കി. അധ്യാപകനെതിരെ കടുത്ത നടപടി വേണമെന്ന വിദ്യാര്‍ത്ഥികളുടെ ആവശ്യത്തിന് മാനേജ്മെന്റ് വഴങ്ങുകയായിരുന്നു. ജാതി അധിക്ഷേപവും വിവേചനവും നേരിടേണ്ടി വന്നതിനെത്തുടര്‍ന്നാണ് നിതിന്‍ ജീവിതം അവസാനിപ്പിച്ചതെന്ന പരാതിയില്‍ പോലീസ് അന്വേഷണം ഊര്‍ജ്ജിതമാക്കിയിട്ടുണ്ട്.
ഡോ. റാമിനെതിരെ കോളേജിലെ നിരവധി വിദ്യാര്‍ത്ഥികളും ഗുരുതര ആരോപണങ്ങളുമായി രംഗത്തെത്തി. ഏകദേശം മുന്നൂറോളം വിദ്യാര്‍ത്ഥികളാണ് ഇയാള്‍ക്കെതിരെ മൊഴി നല്‍കിയത്. വിദ്യാര്‍ത്ഥികളെ അവരുടെ നിറത്തിന്റെ പേരിലും ജാതിയുടെയും മതത്തിന്റെയും അടിസ്ഥാനത്തിലും വേര്‍തിരിച്ച് കാണുന്ന രീതിയായിരുന്നു ഇയാള്‍ക്കെന്നു വിദ്യാര്‍ത്ഥികള്‍ വെളിപ്പെടുത്തി. ഇത് സ്ഥാപനത്തിനുള്ളില്‍ വലിയ പ്രതിഷേധത്തിന് വഴിവെച്ചു. നിതിന്റെ മരണത്തിന് പിന്നാലെ ഡോ. റാം ഒളിവില്‍ പോയിരിക്കുകയാണ്. ഇയാളെ ഉടന്‍ അറസ്റ്റ് ചെയ്യണമെന്നാവശ്യപ്പെട്ട് രാഷ്‌ട്രീയ സംഘടനകളും വിദ്യാര്‍ത്ഥി കൂട്ടായ്മകളും പ്രതിഷേധം ശക്തമാക്കി. നീതി ലഭിക്കുന്നതുവരെ പോരാട്ടം തുടരുമെന്ന് വിദ്യാര്‍ത്ഥികള്‍ വ്യക്തമാക്കി.
ഡോ. റാം, ഡോ. സംഗീത എന്നിവര്‍ക്കെതിരെ ആത്മഹത്യാ പ്രേരണക്കുറ്റത്തിന് പുറമെ പട്ടികജാതി-വര്‍ഗ അതിക്രമ നിരോധന നിയമപ്രകാരവും കേസ് രജിസ്റ്റര്‍ ചെയ്തിട്ടുണ്ട്. ആദ്യഘട്ടത്തില്‍ ഇരുവരെയും സസ്പെന്‍ഡ് ചെയ്തിരുന്നെങ്കിലും ഡോ. റാമിനെ ഇനി കോളേജിലേക്ക് തിരിച്ചെടുക്കില്ലെന്ന് അധികൃതര്‍ ഉറപ്പുനല്‍കി. ഒളിവില്‍ കഴിയുന്ന പ്രതിയെ കണ്ടെത്താന്‍ പോലീസ് തിരച്ചില്‍ ഊര്‍ജ്ജിതമാക്കി.
