കൊച്ചി: അക്ഷരശ്ലോകം, കാവ്യകേളി, സാഹിത്യം എന്നീ മേഖലകളിൽ നൽകിയ സമഗ്രസംഭാവനകൾ പരിഗണിച്ച് പി.വി. കൃഷ്ണൻ കുറൂരിനെ ഈ വർഷത്തെ സി.എം. വിഷ്ണു നമ്പൂതിരി എൻഡോവ്മെന്റ് പുരസ്കാരത്തിനായി തെരഞ്ഞെടുത്തു. ഷൊർണൂർ വൈഷ്ണവം ട്രസ്റ്റ് ഏർപ്പെടുത്തിയതാണ് ഈ അവാർഡ്. മെയ് 8-ന് വൈകിട്ട് 4 മണിക്ക് ഇടപ്പള്ളി ചങ്ങമ്പുഴ പാർക്കിൽ വെച്ചാണ് ചടങ്ങ് നടക്കുന്നത്.
ട്രസ്റ്റ് ചെയർമാൻ ഡോ. സി.എം. നീലകണ്ഠൻ പുരസ്കാരം സമ്മാനിക്കും. ചടങ്ങിന് മുന്നോടിയായി ഉച്ചയ്ക്ക് 2 മണി മുതൽ ആലുവ തെക്കേ വാഴക്കുളം കാവ്യകലാകേന്ദ്രത്തിന്റെ നേതൃത്വത്തിൽ അക്ഷരശ്ലോക-കാവ്യകേളി സദസ്സും അരങ്ങേറും. പുരസ്കാര സമർപ്പണത്തോടൊപ്പം പി.വി. കൃഷ്ണൻ കുറൂർ രചിച്ച ‘കാവ്യപ്രഭാവം’ എന്ന കാവ്യകേളി പാഠപുസ്തകത്തിന്റെ പ്രകാശനവും ചടങ്ങിൽ നടക്കും. സങ്കീർത്തന ഷൈജു, സൗപർണിക ഷൈജു എന്നിവർ അവതരിപ്പിക്കുന്ന ഭരതനാട്യ കച്ചേരിയും പരിപാടിയുടെ ഭാഗമായി ഉണ്ടായിരിക്കും. സാംസ്കാരിക സമ്മേളനത്തിൽ പ്രൊഫ. കെ.ജി. പൗലോസ്, പ്രൊഫ. എം. തോമസ് മാത്യു, ഡോ. അഥീന നിരഞ്ജൻ, ഡോ. എസ്.വി. ആര്യാംബിക, പ്രൊഫ. പി.ജി. ശങ്കരൻ തുടങ്ങി സാംസ്കാരിക-സാഹിത്യ രംഗത്തെ പ്രമുഖർ പങ്കെടുക്കുമെന്ന് സംഘാടകർ അറിയിച്ചു.
