കൊല്ലം: വിപണിയിലെ പാചകവാതക ക്ഷാമം മുതലെടുത്ത് സിലിണ്ടറുകളില് ഗ്യാസ് കുറച്ച് വില്ക്കുന്ന സംഘങ്ങള്ക്കെതിരെ എന്ഫോഴ്സ്മെന്റ് വിഭാഗം നടപടി തുടങ്ങി. കൊല്ലം, തിരുവനന്തപുരം, പത്തനംതിട്ട ജില്ലകള് കേന്ദ്രീകരിച്ച് നടത്തിയ റെയ്ഡുകളില് ആയിരത്തോളം സിലിണ്ടറുകളാണ് ഉദ്യോഗസ്ഥര് കസ്റ്റഡിയിലെടുത്തത്. സംസ്ഥാനത്തൊട്ടാകെ ഇതിനകം മൂവായിരത്തോളം സിലിണ്ടറുകള് പിടിച്ചെടുത്തതായി പത്തനംതിട്ട ജില്ലാ സപ്ലൈ ഓഫീസര് ജി.എസ്. ഗോപകുമാര് അറിയിച്ചു.
ഗ്യാസ് ഏജന്സികളിലെ ചില ജീവനക്കാരും വിതരണക്കാരും ചേര്ന്നാണ് പ്രധാനമായും തട്ടിപ്പ് ആസൂത്രണം ചെയ്യുന്നത്. കൊമേഴ്സ്യല് (വാണിജ്യ) സിലിണ്ടറുകളിലാണ് പ്രധാനമായും കൃത്രിമം നടക്കുന്നത്. 19 കിലോ ഗ്യാസ് ഉണ്ടാകേണ്ട സിലിണ്ടറുകളില് നിന്ന് ഗ്യാസ് ചോര്ത്തി 14-15 കിലോ മാത്രം നിറച്ചാണ് പലയിടത്തും വിതരണം ചെയ്യുന്നത്. ഒന്നിലധികം സിലിണ്ടറുകള് ബുക്ക് ചെയ്യുന്ന ഉപഭോക്താക്കള്ക്ക് കുറഞ്ഞ അളവില് ഗ്യാസ് നല്കി, ബാക്കി വരുന്നത് കാലി സിലിണ്ടറുകളിലേക്ക് മാറ്റി മറിച്ചുവില്ക്കുന്നു. ഗാര്ഹിക ആവശ്യത്തിനുള്ള സിലിണ്ടറുകള് വേഗത്തില് ബുക്ക് ചെയ്യിപ്പിച്ച് അതില് നിന്ന് ഗ്യാസ് വാണിജ്യ സിലിണ്ടറുകളിലേക്ക് മാറ്റി നിറച്ച് ലാഭം കൊയ്യുന്ന രീതിയും വ്യാപകമാണ്.
വാണിജ്യ സിലിണ്ടറുകള്ക്ക് വിതരണ പരിധിയില്ലാത്തത് തട്ടിപ്പുകാര്ക്ക് സൗകര്യമാകുന്നുണ്ടെന്ന് ഉദ്യോഗസ്ഥര് നിരീക്ഷിച്ചു. ചില സ്വകാര്യ ഗ്യാസ് ഏജന്സികളുടെ മറവിലും ഇത്തരം നിയമവിരുദ്ധ പ്രവര്ത്തനങ്ങള് നടക്കുന്നുണ്ട്. സപ്ലൈ ഓഫീസര്മാരും എന്ഫോഴ്സ്മെന്റ് വിഭാഗവും സംയുക്തമായി വരും ദിവസങ്ങളിലും പരിശോധന തുടരും. കൃത്രിമം കാണിക്കുന്ന ഏജന്സികള്ക്കെതിരെയും ജീവനക്കാര്ക്കെതിരെയും കര്ശന നിയമനടപടികള് സ്വീകരിക്കുമെന്നും അധികൃതര് മുന്നറിയിപ്പ് നല്കി. സിലിണ്ടറുകള് വാങ്ങുമ്പോള് ഉപഭോക്താക്കള് തൂക്കം പരിശോധിക്കണമെന്നും സംശയമുണ്ടെങ്കില് ഉദ്യോഗസ്ഥരെ അറിയിക്കണമെന്നും നിര്ദ്ദേശമുണ്ട്.
