ദുബായ്/ന്യൂഡല്ഹി: ഹോര്മുസ് കടലിടുക്കില് വെച്ച് രണ്ട് ഇന്ത്യന് കപ്പലുകള്ക്ക് നേരെ ഇറാന്റെ ഇസ്ലാമിക് റെവല്യൂഷണറി ഗാര്ഡ് കോര്പ്സ് വെടിയുതിര്ത്ത സംഭവത്തില് ഞെട്ടിക്കുന്ന ഓഡിയോ പുറത്ത്. കടലിടുക്കിലൂടെ കടന്നുപോകാന് അനുമതി ലഭിച്ചതിന് പിന്നാലെയാണ് കപ്പലുകള്ക്ക് നേരെ ആക്രമണമുണ്ടായത്. ഇതോടെ കപ്പലുകള് യാത്ര ഉപേക്ഷിച്ചു പിന്വാങ്ങി. കപ്പലിലെ ക്യാപ്റ്റന് സംസാരിക്കുന്ന ഓഡിയോയാണ് ഇപ്പോള് പറുത്ത് വന്നിരിക്കുന്നത്. ഇന്ത്യന് കപ്പലായ ‘സന്മാര് ഹെറാള്ഡിലെ’ ക്യാപ്റ്റനും ഇറാന് നാവികസേനയും തമ്മിലുള്ള റേഡിയോ സന്ദേശമാണ് പുറത്തുവന്നത്.
‘സെപാ നേവി! ഇത് സന്മാര് ഹെറാള്ഡ് ആണ്. നിങ്ങള് എനിക്ക് പോകാന് അനുമതി തന്നതാണ്. നിങ്ങളുടെ പട്ടികയില് രണ്ടാമതായാണ് എന്റെ പേരുള്ളത്. എന്നിട്ടും നിങ്ങള് വെടിയുതിര്ക്കുന്നു! എന്നെ തിരിച്ചുപോകാന് അനുവദിക്കൂ!’ – പരിഭ്രാന്തനായ ക്യാപ്റ്റന് വിളിച്ചുപറയുന്നത് ഓഡിയോയില് വ്യക്തമാണ്. എങ്കിലും ഇറാന്റെ ഭാഗത്ത് നിന്ന് വെടിയുതിര്ക്കുകയായിരുന്നു. സന്മാര് ഹെറാള്ഡ് ഉള്പ്പെടെ രണ്ട് ഇന്ത്യന് കപ്പലുകള്ക്ക് നേരെയാണ് ആക്രമണം നടന്നത്. ഇതില് ഒരു സൂപ്പര് ടാങ്കറില് 20 ലക്ഷം ബാരല് ഇറാഖി എണ്ണ ഉണ്ടായിരുന്നു.
ഖെഷം, ലാരക് ദ്വീപുകള്ക്കിടയില് വെച്ചാണ് വെടിവെപ്പുണ്ടായത്. ഇറാന് സേനയുടെ തോക്കുധാരികളായ ബോട്ടുകള് കപ്പലുകളെ വളയുകയും വെടിയുതിര്ക്കുകയുമായിരുന്നു. അമേരിക്കയുമായുള്ള ചര്ച്ചകള് പരാജയപ്പെട്ടതിനെത്തുടര്ന്ന് ഹോര്മുസ് കടലിടുക്ക് വീണ്ടും പൂര്ണ്ണമായും അടച്ചതായി ഇറാന് റേഡിയോ സന്ദേശത്തിലൂടെ പ്രഖ്യാപിച്ചു. ഒരു രാജ്യത്തെയും കപ്പലുകളെ കടത്തിവിടില്ലെന്നാണ് ഇറാന്റെ നിലപാട്.
സംഭവത്തില് ഇന്ത്യ കടുത്ത പ്രതിഷേധം രേഖപ്പെടുത്തി. ഡല്ഹിയിലെ ഇറാന് സ്ഥാനപതിയെ വിദേശകാര്യ മന്ത്രാലയം വിളിച്ചുവരുത്തി ആശങ്ക അറിയിച്ചു. കപ്പലിലെ ജീവനക്കാരും കപ്പലുകളും സുരക്ഷിതരാണെന്ന് സര്ക്കാര് വൃത്തങ്ങള് സ്ഥിരീകരിച്ചു. ഇന്ത്യന് കപ്പലുകളുടെ സുരക്ഷ ഉറപ്പാക്കണമെന്ന് സ്ഥാനപതിയോട് ഇന്ത്യ ആവശ്യപ്പെട്ടു. നിലവില് ഷിപ്പിംഗ് ഡയറക്ടറേറ്റ് ജനറല് സ്ഥിതിഗതികള് നിരീക്ഷിച്ചുവരികയാണ്. മേഖലയിലെ ഇന്ത്യന് നാവികരുടെയും കപ്പലുകളുടെയും സുരക്ഷ ഉറപ്പാക്കാനുള്ള നടപടികള് സര്ക്കാര് സ്വീകരിച്ചിട്ടുണ്ട്.
