ന്യൂഡല്‍ഹി/കൊല്‍ക്കത്ത: പശ്ചിമബംഗാളില്‍ ജനാധിപത്യത്തിന്റെ ഉത്സവത്തിന് തുടക്കം കുറിച്ചുകൊണ്ട് ഒന്നാം ഘട്ട തിരഞ്ഞെടുപ്പിന്റെ പരസ്യപ്രചാരണം ഇന്ന് സമാപിച്ചു. 16 ജില്ലകളിലായി വ്യാപിച്ചു കിടക്കുന്ന 152 മണ്ഡലങ്ങളാണ് മറ്റന്നാള്‍ പോളിംഗ് ബൂത്തിലേക്ക് നീങ്ങുന്നത്. സംസ്ഥാനത്ത് സമാധാനപരമായ അന്തരീക്ഷം ഉറപ്പാക്കാന്‍ കേന്ദ്ര സര്‍ക്കാര്‍ കര്‍ശന സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്. കഴിഞ്ഞ കാലങ്ങളില്‍ ബംഗാള്‍ തിരഞ്ഞെടുപ്പുകള്‍ നേരിട്ട അക്രമസംഭവങ്ങള്‍ ആവര്‍ത്തിക്കാതിരിക്കാന്‍ കേന്ദ്ര ആഭ്യന്തര മന്ത്രാലയം അതീവ ജാഗ്രതയിലാണ്. ഇന്ന് കൊട്ടിക്കലാശം നടക്കും.
ചരിത്രത്തിലാദ്യമായി 2.4 ലക്ഷം സുരക്ഷാ ഉദ്യോഗസ്ഥരെയാണ് വിന്യസിച്ചിരിക്കുന്നത്. 2400 കമ്പനി കേന്ദ്ര സേനയുടെ സാന്നിധ്യം വോട്ടര്‍മാര്‍ക്ക് നിര്‍ഭയമായി വോട്ട് ചെയ്യാന്‍ ആത്മവിശ്വാസം നല്‍കുന്നു. ഗുണ്ടാ ഭരണത്തിന് അറുതി വരുത്തി ജനാധിപത്യം സംരക്ഷിക്കുമെന്ന ഉറച്ച നിലപാടിലാണ് കേന്ദ്ര ഏജന്‍സികള്‍. ബിജെപിക്ക് ശക്തമായ സ്വാധീനമുള്ള വടക്കന്‍ ബംഗാളില്‍ കേന്ദ്ര ആഭ്യന്തര മന്ത്രി അമിത് ഷായുടെ നേതൃത്വത്തില്‍ വന്‍ റാലികളാണ് നടന്നത്. കഴിഞ്ഞ തവണ ബിജെപി മികച്ച മുന്നേറ്റം നടത്തിയ ഈ മേഖലയില്‍ ഇത്തവണയും ജനപിന്തുണ ഏറുന്ന കാഴ്ചയാണ് ഉള്ളത്.
ദീര്‍ഘകാലമായി നിലനില്‍ക്കുന്ന ഗോര്‍ഖാലാന്‍ഡ് വിഷയത്തില്‍ ശാശ്വതമായ പരിഹാരം കാണുമെന്ന് ബിജെപി ഉറപ്പുനല്‍കി. മേഖലയിലെ കേസുകള്‍ പിന്‍വലിക്കുമെന്നും ജനങ്ങളുടെ ആശങ്കകള്‍ അകറ്റുമെന്നും അമിത് ഷാ വ്യക്തമാക്കി. മമത ബാനര്‍ജി സര്‍ക്കാര്‍ ഒരു പ്രത്യേക വിഭാഗത്തെ പ്രീണിപ്പിക്കുകയും വടക്കന്‍ ബംഗാളിനെ അവഗണിക്കുകയും ചെയ്യുകയാണെന്ന വികാരം ജനങ്ങള്‍ക്കിടയില്‍ ശക്തമാണ്. ഈ വിവേചനം അവസാനിപ്പിക്കാനാണ് ബിജെപി വോട്ട് തേടുന്നത്. സംസ്ഥാനത്ത് നടക്കുന്ന അഴിമതികളെക്കുറിച്ച് അന്വേഷിക്കുന്ന കേന്ദ്ര ഏജന്‍സികളെ രാഷ്‌ട്രീയമായി നേരിടാനാണ് തൃണമൂല്‍ ശ്രമിക്കുന്നതെന്ന് ബിജെപി ആരോപിച്ചു.
ഐപാക് അടക്കമുള്ള സ്ഥാപനങ്ങള്‍ക്കെതിരെ നടക്കുന്ന അന്വേഷണത്തില്‍ മമത ബാനര്‍ജി അസ്വസ്ഥയാകുന്നത് എന്തിനാണെന്ന് ബിജെപി സംസ്ഥാന ഉപാധ്യക്ഷ അഗ്‌നിമിത്ര പോള്‍ ചോദിച്ചു. അഴിമതിക്കാര്‍ക്കെതിരെ നിയമപരമായ നടപടികള്‍ തുടരുമെന്ന സൂചനയാണ് ബിജെപി നല്‍കുന്നത്. 3.6 കോടി വോട്ടര്‍മാരുടെ വിധി നിര്‍ണ്ണയിക്കുന്ന മറ്റന്നാളത്തെ വോട്ടെടുപ്പില്‍ ബിജെപി വലിയ വിജയമാണ് പ്രതീക്ഷിക്കുന്നത്. ഗുണ്ടാ വിളയാട്ടമില്ലാത്ത പുതിയൊരു ബംഗാള്‍ കെട്ടിപ്പടുക്കാനായി ജനങ്ങള്‍ വിധിയെഴുതുമെന്ന് പാര്‍ട്ടി നേതൃത്വം പ്രത്യാശ പ്രകടിപ്പിച്ചു.
