ചെന്നൈ: ഐ.പി.എല്ലില് പരിക്കിന്റെ പിടിയിലായ ചെന്നൈ സൂപ്പര് കിങ്സിന് വീണ്ടും തിരിച്ചടി. ടീമിന്റെ വിശ്വസ്തനായ യുവ ഓപ്പണര് ആയുഷ് മാത്രെ പേശിവലിവിനെത്തുടര്ന്ന് സീസണിലെ അവശേഷിക്കുന്ന മത്സരങ്ങളില് നിന്ന് പുറത്തായി. ആറ് കളിയില് നിന്ന് 201 റണ്സുമായി ടീമിന്റെ ബാറ്റിങ് നെടുംതൂണായിരുന്ന മാത്രെയ്ക്ക് മൂന്ന് മാസത്തോളം വിശ്രമം വേണ്ടിവരുമെന്നാണ് റിപ്പോര്ട്ടുകള്. സീസണ് തുടങ്ങിയത് മുതല് ചെന്നൈയെ പരിക്ക് വിടാതെ പിന്തുടരുകയാണ്.
നഥാന് എല്ലിസ്, ഖലീല് അഹമ്മദ് എന്നിവര് നേരത്തെ തന്നെ പുറത്തായിരുന്നു. ഡെവാള്ഡ് ബ്രെവിസിന് തുടക്കത്തിലെ മത്സരങ്ങള് നഷ്ടമായി. ഈ പ്രതിസന്ധികള്ക്കിടയിലാണ് ഏറ്റവും കൂടുതല് റണ്സ് നേടിയ ആയുഷ് മാത്രെയും ഇപ്പോള് മടങ്ങുന്നത്. അതേസമയം, ആരാധകര് കാത്തിരുന്ന ആ വാര്ത്തയ്ക്കും ചെന്നൈ ക്യാമ്പില് നിന്ന് സൂചന ലഭിച്ചു കഴിഞ്ഞു. ഇതിഹാസ താരം എം.എസ്. ധോനി മുംബൈ ഇന്ത്യന്സിനെതിരായ മത്സരത്തില് കളത്തിലിറങ്ങിയേക്കും. നെറ്റ്സില് ബാറ്റിങ്ങിനൊപ്പം വിക്കറ്റ് കീപ്പിങ്ങിലും ധോനി കഠിന പരിശീലനം നടത്തുന്നത് വരാനിരിക്കുന്ന വലിയ മാറ്റത്തിന്റെ സൂചനയായാണ് വിലയിരുത്തപ്പെടുന്നത്.
ധോനിയുടെ പരിശീലനത്തെക്കുറിച്ച് മുന് താരം ആര്. അശ്വിന് രസകരമായ നിരീക്ഷണം പങ്കുവെച്ചു. ‘ധോനി വിക്കറ്റ് കീപ്പിങ് പരിശീലിക്കുന്നത് ജീവിതത്തില് ആദ്യമായാണ് കാണുന്നത്. അദ്ദേഹം ഗ്ലൗസ് അണിയുകയാണെങ്കില് സഞ്ജു സാംസണ് ഫീല്ഡിങ്ങിലേക്ക് മാറേണ്ടി വരും, അല്ലെങ്കില് സഞ്ജുവിനെ ഒരു ഇംപാക്ട് പ്ലെയറായി ഉപയോഗിച്ചേക്കാം,’ അശ്വിന് തന്റെ യൂട്യൂബ് ചാനലിലൂടെ പറഞ്ഞു. പ്രധാന താരങ്ങള് പുറത്തായ സാഹചര്യത്തില് ധോനിയുടെ തിരിച്ചുവരവ് ടീമിന് എത്രത്തോളം ആത്മവിശ്വാസം നല്കുമെന്ന ഉറ്റുനോക്കുകയാണ് ക്രിക്കറ്റ് ലോകം.
