മലപ്പുറം: അമ്മയുടെ സ്മരണ നിലനിർത്താനും ജീവകാരുണ്യ പ്രവർത്തനങ്ങൾക്കുമായി സ്വന്തം ഭൂമിയും വീടും വിട്ടുനൽകി നരിപ്പറമ്പ് എളവീട് കുടുംബം മാതൃകയാകുന്നു. പൊന്നാനി താലൂക്കിലെ കാലടി വില്ലേജിൽ നരിപ്പറമ്പ് ദേശത്തെ പരേതരായ എളവീട് ഗോവിന്ദൻകുട്ടി നായരുടെയും പത്മാവതി അമ്മയുടെയും മക്കളാണ് തങ്ങളുടെ ഉടമസ്ഥതയിലുള്ള സ്വത്ത് സേവാഭാരതിക്ക് കൈമാറിയത്.
എളവീട് സരസ്വതി, പൊറ്റെകളത്തിൽ മാധവിക്കുട്ടി, പുതുമനപ്പുള്ളി ലക്ഷ്മിദേവി, എളവീട് ലത എന്നിവർ ചേർന്നാണ് പുണ്യകർമ്മം നിർവ്വഹിച്ചത്. അവരുടെ കൈവശമുള്ള 15.74 സെന്റ് സ്ഥലവും അതിലെ വീടും ആണ് നൽകിയത്. ഈ സ്ഥലത്ത് പരേതയായ പത്മാവതി അമ്മയുടെ ഓർമ്മ നിലനിർത്തുന്നതിനായി ‘പി.കെ. ഗോവിന്ദൻകുട്ടി ആൻഡ് പത്മാവതി അമ്മ മെമ്മോറിയൽ’ എന്ന പേരിൽ ഒരു സേവാഭാരതിയുടെ നേതൃത്വത്തിൽ സേവാ സ്ഥാനം ഉയരും.
