തൃശ്ശൂര്‍: ലോകപ്രശസ്തമായ തൃശ്ശൂര്‍ പൂരത്തിന്റെ വിളംബരം കുറിച്ച് നെയ്തലക്കാവിലമ്മ വടക്കുന്നാഥ ക്ഷേത്രത്തിന്റെ തെക്കേ ഗോപുരനട തുറന്നു. ആയിരക്കണക്കിന് പൂരപ്രേമികളെ സാക്ഷിയാക്കി, എറണാകുളം ശിവകുമാര്‍ എന്ന കൊമ്പന്റെ പുറത്തേറിയാണ് അമ്മ പൂരനഗരിയിലേക്ക് എത്തിയത്. ഇതോടെ പൂരത്തിന്റെ പ്രധാന ചടങ്ങുകള്‍ക്ക് തുടക്കമായി. കനത്ത ചൂടിനെ അവഗണിച്ചും വലിയ ജനവലിയാണ് വിളംബര ചടങ്ങ് കാണാന്‍ തടിച്ചുകൂടിയത്. എന്നാല്‍ മുണ്ടത്തിക്കോട് അപകടത്തിന്റെ പശ്ചാത്തലത്തില്‍ ഇത്തവണ പൂരത്തിന് കര്‍ശന നിയന്ത്രണങ്ങളാണ് ഏര്‍പ്പെടുത്തിയിരിക്കുന്നത്.
സുരക്ഷാ മുന്‍കരുതലിന്റെ ഭാഗമായി വര്‍ണ്ണാഭമായ വെടിക്കെട്ടുകള്‍ ഇത്തവണ ഉണ്ടാവില്ല. ആചാരപരമായ ചടങ്ങുകള്‍ മാത്രമായി ഇത് പരിമിതപ്പെടുത്തിയിട്ടുണ്ട്. പൂരത്തിലെ പ്രധാന ആകര്‍ഷണമായ കുടമാറ്റം ഇത്തവണ വെറും 15 മിനിറ്റായി ചുരുക്കി. ജനത്തിരക്കും താപനിലയും പരിഗണിച്ച് വന്‍ സുരക്ഷാ സന്നാഹങ്ങളാണ് നഗരത്തില്‍ ഒരുക്കിയിരിക്കുന്നത്. ഞായറാഴ്ചയാണ് പ്രധാന പൂരം നടക്കുന്നത്. ആഘോഷങ്ങള്‍ കുറച്ച് ചടങ്ങുകള്‍ക്ക് പ്രാധാന്യം നല്‍കുന്ന ഇത്തവണത്തെ പൂരം സുരക്ഷിതമായി പൂര്‍ത്തിയാക്കാനാണ് അധികൃതരുടെ തീരുമാനം.
