ന്യൂഡല്ഹി: ഇന്ത്യയും ന്യൂസിലന്ഡും തമ്മിലുള്ള സാമ്പത്തിക ബന്ധം പുതിയ തലത്തിലേക്ക് ഉയര്ത്തിക്കൊണ്ട് ഇരുരാജ്യങ്ങളും നാളെ സ്വതന്ത്ര വ്യാപാര കരാറില് ഒപ്പുവെക്കുന്നു. ഇന്ത്യന് കയറ്റുമതി മേഖലയ്ക്ക് വന് കുതിപ്പേകുന്ന ഈ കരാറിലൂടെ ന്യൂസിലന്ഡിലേക്കുള്ള എല്ലാ ഉല്പ്പന്നങ്ങള്ക്കും പൂര്ണ്ണമായ തീരുവ ഇളവ് ലഭ്യമാകും. വ്യാപാരത്തിനപ്പുറം വന്തോതിലുള്ള നിക്ഷേപ വാഗ്ദാനങ്ങളും കരാറിന്റെ ഭാഗമാണ്. അടുത്ത 15 വര്ഷത്തിനുള്ളില് ഇന്ത്യയുടെ അടിസ്ഥാന സൗകര്യ വികസനം, നിര്മ്മാണം, സേവന മേഖല എന്നിവയിലായി 1.6 ലക്ഷം കോടി രൂപ (20 ബില്യണ് ഡോളര്) ന്യൂസിലന്ഡ് നിക്ഷേപിക്കും.
ഇന്ത്യന് ഉദ്യോഗാര്ത്ഥികള്ക്കും വലിയ അവസരങ്ങളാണ് കരാര് ഉറപ്പുനല്കുന്നത്. ഐടി, ഹെല്ത്ത് കെയര്, എന്ജിനീയറിങ് മേഖലകളിലെ 5,000 വിദഗ്ധര്ക്ക് ഓരോ വര്ഷവും താല്ക്കാലിക തൊഴില് വിസ ലഭിക്കും. ആയുഷ് മേഖലയിലുള്ളവര്, യോഗാ അധ്യാപകര്, ഷെഫുമാര് എന്നിവര്ക്കും ന്യൂസിലന്ഡില് പ്രത്യേക തൊഴില് പരിഗണന ലഭിക്കും. അതേസമയം, രാജ്യത്തെ കര്ഷകരുടെ താല്പ്പര്യം സംരക്ഷിക്കുന്നതിനായി തന്ത്രപ്രധാനമായ ചില മേഖലകളെ കരാറില് നിന്ന് ഇന്ത്യ ഒഴിവാക്കി.
ന്യൂസിലന്ഡിന്റെ പ്രധാന കയറ്റുമതി ഉല്പ്പന്നങ്ങളായ പാല്, ചീസ്, തൈര് എന്നിവയുടെ ഇറക്കുമതിയില് ഇളവുകള് നല്കേണ്ടതില്ലെന്നാണ് ഇന്ത്യയുടെ തീരുമാനം. കൂടാതെ പഞ്ചസാര, ഉള്ളി, സുഗന്ധവ്യഞ്ജനങ്ങള്, ഭക്ഷ്യ എണ്ണകള് എന്നിവയെയും കരാറിന് പുറത്ത് നിര്ത്തിയിട്ടുണ്ട്. നിലവില് ഒരു ബില്യണ് ഡോളറിലൊതുങ്ങുന്ന ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം അടുത്ത അഞ്ച് വര്ഷത്തിനുള്ളില് അഞ്ച് ബില്യണ് ഡോളറിലേക്ക് (ഏകദേശം 40,000 കോടി രൂപ) ഉയര്ത്താനാണ് ലക്ഷ്യമിടുന്നത്. ഈ കരാര് യാഥാര്ത്ഥ്യമാകുന്നതോടെ പസഫിക് മേഖലയിലെ ഇന്ത്യയുടെ സാമ്പത്തിക സാന്നിധ്യം കൂടുതല് ശക്തമാകും.
