കോട്ടയം/പത്തനംതിട്ട: മുണ്ടത്തിക്കോട് വെടിക്കെട്ട് ദുരന്തത്തിന്റെ നടുക്കത്തില്‍ കേരളത്തിലെ പ്രമുഖ ദേവാലയങ്ങള്‍ പെരുന്നാള്‍ ആഘോഷങ്ങളില്‍ നിന്ന് വെടിക്കെട്ട് ഒഴിവാക്കുന്നു. മലങ്കര സഭാധ്യക്ഷന്റെ പ്രത്യേക അഭ്യര്‍ത്ഥന മാനിച്ചാണ് വിശ്വാസിസമൂഹം ഈ മാതൃകാപരമായ തീരുമാനമെടുത്തത്. ഏറെ പ്രശസ്തമായ പുതുപ്പള്ളി പള്ളിയിലെ മെയ് മാസത്തെ പ്രധാന പെരുന്നാളിന് ഇത്തവണ കരിമരുന്ന് പ്രയോഗം ഉണ്ടാവില്ലെന്ന് ഇടവക ഭരണസമിതി അറിയിച്ചു. സഭാധ്യക്ഷന്റെ ആഹ്വാനം ഉള്‍ക്കൊണ്ടാണ് ഈ തീരുമാനം.
ആഗോള ജോര്‍ജ്ജിയന്‍ തീര്‍ത്ഥാടന കേന്ദ്രമായ പത്തനംതിട്ട ചന്ദനപ്പള്ളി വലിയ പള്ളിയിലും വെടിക്കെട്ട് വേണ്ടെന്ന് വെച്ചു. മെയ് 7, 8 തീയതികളില്‍ നടക്കുന്ന വലിയ പെരുന്നാളിനോട് അനുബന്ധിച്ചുള്ള വെടിക്കെട്ടിനായി മാറ്റിവെച്ച തുക ജീവകാരുണ്യ പ്രവര്‍ത്തനങ്ങള്‍ക്കായി ഉപയോഗിക്കും. സമാനമായി, കോട്ടയം ആര്‍പ്പൂക്കര കല്ലുങ്കത്ര മണലേല്‍ സെന്റ് ജോര്‍ജ് ഓര്‍ത്തഡോക്‌സ് ഇടവകയും തങ്ങളുടെ പെരുന്നാള്‍ വെടിക്കെട്ട് ഒഴിവാക്കിയിട്ടുണ്ട്. ഏപ്രില്‍ 26 മുതല്‍ മെയ് 1 വരെയാണ് ഇവിടെ പെരുന്നാള്‍ നടക്കുന്നത്.
തൃശൂര്‍ പൂരത്തിന്റെ വെടിക്കെട്ട് പുരയിലുണ്ടായ സ്‌ഫോടനത്തിന്റെ ആഘാതത്തിലാണ് സംസ്ഥാനം ഇപ്പോഴും. ഏപ്രില്‍ 21-ന് നടന്ന അപകടത്തില്‍ മരണസംഖ്യ 15 ആയി ഉയര്‍ന്നു. വെന്റിലേറ്ററില്‍ ചികിത്സയിലായിരുന്ന പ്രവീണ്‍, ലൈസന്‍സി സതീശന്‍ എന്നിവര്‍ കൂടി മരിച്ചതോടെയാണ് ദുരന്തത്തിന്റെ വ്യാപ്തി വര്‍ദ്ധിച്ചത്. ഈ സാഹചര്യത്തില്‍ തൃശൂര്‍ പൂരവും വെടിക്കെട്ടില്ലാതെയാണ് ആഘോഷിക്കുന്നത്. ജനങ്ങളുടെ സുരക്ഷ മുന്‍നിര്‍ത്തിയും ദുരന്തബാധിതരോടുള്ള ആദരസൂചകമായും ആരാധനാലയങ്ങള്‍ എടുത്ത ഈ തീരുമാനങ്ങള്‍ വലിയ പ്രശംസ പിടിച്ചുപറ്റുകയാണ്.
