കൊല്ലം: ജില്ലാ ആശുപത്രിക്ക് സമീപം പ്രവര്‍ത്തിക്കുന്ന പ്രമുഖ ഡ്രൈ ഫ്രൂട്ട്‌സ് മൊത്തവ്യാപാര സ്ഥാപനമായ ‘സ്റ്റെയിന്‍സ് ട്രേഡിംഗില്‍’ വന്‍ കവര്‍ച്ച. ലോക്കറിലും ബില്ലിംഗ് കൗണ്ടറിലുമായി സൂക്ഷിച്ചിരുന്ന 23 ലക്ഷം രൂപയാണ് മോഷ്ടാക്കള്‍ അപഹരിച്ചത്. ഇന്ന് പുലര്‍ച്ചെയായിരുന്നു നാടിനെ നടുക്കിയ ഈ സംഭവം. സ്ഥാപനത്തിന്റെ പിന്‍ഭാഗത്തെ വാതില്‍ കമ്പിപ്പാര ഉപയോഗിച്ച് തകര്‍ത്താണ് ക്രിമിനലുകള്‍ അകത്തുകടന്നത്. അതീവ സുരക്ഷിതമെന്ന് കരുതിയ ലോക്കറില്‍ നിന്ന് 20 ലക്ഷം രൂപയും, ദൈനംദിന ഇടപാടുകള്‍ക്കായി ബില്ലിംഗ് ഡ്രോയറില്‍ സൂക്ഷിച്ചിരുന്ന 3 ലക്ഷം രൂപയുമാണ് നഷ്ടപ്പെട്ടത്.
പുലര്‍ച്ചെ 12:00-നും 2:00-നും ഇടയിലാണ് മോഷണം നടന്നതെന്നാണ് സംശം. മുഖം മറച്ചെത്തിയ രണ്ട് പേരാണ് കൃത്യത്തിന് പിന്നിലെന്ന് വ്യക്തമായിട്ടുണ്ട്. കവര്‍ച്ചാ ദൃശ്യങ്ങള്‍ സ്ഥാപനത്തിലെ സി.സി.ടി.വി ക്യാമറകളില്‍ പതിഞ്ഞിട്ടുണ്ട്. ഈ ദൃശ്യങ്ങള്‍ കേന്ദ്രീകരിച്ച് പൊലീസ് അന്വേഷണം ആരംഭിച്ചു. സ്ഥാപനത്തിന്റെ ഉള്‍വശത്തെക്കുറിച്ചും പണം സൂക്ഷിക്കുന്ന ഇടങ്ങളെക്കുറിച്ചും കൃത്യമായ ധാരണയുള്ളവരാണ് കവര്‍ച്ചയ്‌ക്ക് പിന്നിലെന്നാണ് പ്രാഥമിക നിഗമനം.
ഫോറന്‍സിക് വിദഗ്ധരും ഡോഗ് സ്‌ക്വാഡും സ്ഥലത്തെത്തി തെളിവുകള്‍ ശേഖരിച്ചു. നഗരമധ്യത്തില്‍ നടന്ന ഈ സാഹസിക മോഷണം വ്യാപാരികള്‍ക്കിടയില്‍ വലിയ ആശങ്ക പടര്‍ത്തിയിട്ടുണ്ട്. പ്രതികള്‍ക്കായി തിരച്ചില്‍ ഊര്‍ജിതമാക്കിയതായി കൊല്ലം പൊലീസ് അറിയിച്ചു.
