നാഗ്പൂര്: അയോധ്യയിലെ ശ്രീരാമക്ഷേത്രം കേവലമൊരു ക്ഷേത്രമല്ലെന്നും മറിച്ച് വിദേശാധിപത്യത്തിനെതിരെ ഭാരതീയര് നടത്തിയ ഐതിഹാസികമായ പോരാട്ടത്തിന്റെ വിജയമാണെന്നും ഭയ്യാജി ജോഷി. നാഗ്പൂരിലെ രേശിംബാഗില് ഡോ. ഹെഡ്ഗേവാര് സ്മാരക സേവാസമിതി സംഘടിപ്പിച്ച ചടങ്ങില് സംസാരിക്കുകയായിരുന്നു അദ്ദേഹം. ശ്രീരാമജന്മഭൂമി തീര്ത്ഥക്ഷേത്ര നിര്മ്മാണത്തില് പങ്കാളികളായ പ്രമുഖരെ ആദരിക്കുന്നതിനായാണ് സമ്മേളനം നടന്നത്.
നൂറ്റാണ്ടുകള് നീണ്ട അധിനിവേശത്തിന്റെ കറകള് മായ്ച്ചു കളയുന്ന ഒന്നാണ് രാമക്ഷേത്രമെന്ന് അദ്ദേഹം പറഞ്ഞു. ഇതൊരു ഭൂമിക്ക് വേണ്ടിയുള്ള തര്ക്കമായിരുന്നില്ല, മറിച്ച് ഭാരതത്തിന്റെ നഷ്ടപ്പെട്ട ആത്മാവിനെ വീണ്ടെടുക്കാനുള്ള യാത്രയായിരുന്നു. നമ്മുടെ പൂര്വ്വികര് ഈ ലക്ഷ്യത്തിനായി നടത്തിയ വലിയ ത്യാഗങ്ങളുടെയും ബലിദാനങ്ങളുടെയും പരിസമാപ്തിയാണ് ഇന്നു കാണുന്ന ഈ പുണ്യക്ഷേത്രമെന്നും അദ്ദേഹം കൂട്ടിച്ചേര്ത്തു.
ക്ഷേത്രനിര്മ്മാണം ഭാരതത്തില് പുതിയൊരു സാംസ്കാരിക നവോത്ഥാനത്തിന് തുടക്കമിട്ടതായി ഭയ്യാജി ജോഷി അഭിപ്രായപ്പെട്ടു. ഇതിന്റെ പ്രധാന പ്രത്യേകതകള് അദ്ദേഹം അക്കമിട്ടു നിരത്തി. രാമക്ഷേത്രം എല്ലാ വിഭാഗം ജനങ്ങളെയും ഒന്നിപ്പിക്കുന്ന കേന്ദ്രമായി മാറണം. വരുംതലമുറയ്ക്ക് ഭാരതീയ പാരമ്പര്യത്തെയും ധാര്മ്മിക മൂല്യങ്ങളെയും കുറിച്ച് അറിവ് നല്കുന്ന പാഠശാലയായി ഈ ക്ഷേത്രം നിലകൊള്ളും. രാമരാജ്യത്തിന്റെ മൂല്യങ്ങള് മുറുകെപ്പിടിച്ചുകൊണ്ട് ഭാരതം ലോകത്തിന് തന്നെ മാതൃകയാകണം.
ഭാരതീയരുടെ ആത്മഗൗരവം വീണ്ടെടുക്കപ്പെട്ട ഈ നിമിഷം ചരിത്രപരമാണെന്നും അദ്ദേഹം സൂചിപ്പിച്ചു. മഹര്ഷി വ്യാസ് സഭാഗൃഹത്തില് നടന്ന ചടങ്ങില് പ്രമുഖ സാംസ്കാരിക-സാമൂഹിക പ്രവര്ത്തകര് പങ്കെടുത്തു. വരും നാളുകളില് രാമക്ഷേത്രം ഭാരതത്തിന്റെ സാംസ്കാരിക കരുത്തിന്റെ പ്രതീകമായി അറിയപ്പെടുമെന്നും അദ്ദേഹം പ്രത്യാശ പ്രകടിപ്പിച്ചു.
