മേപ്പയ്യൂര്‍: പൊതുനിരത്തില്‍ ഗതാഗത തടസ്സമുണ്ടാക്കി ആഡംബര കാറുകളില്‍ അപകടകരമായ രീതിയില്‍ ‘റോഡ് ഷോ’ നടത്തിയ വിവാഹസംഘത്തിന് എതിരെ നടപടിയുമായി മോട്ടോര്‍ വാഹന വകുപ്പ്. കോഴിക്കോട് മേപ്പയ്യൂര്‍ മഞ്ഞക്കുളത്ത് നടന്ന സംഭവത്തിന്റെ ദൃശ്യങ്ങള്‍ പുറത്തുവന്നതിന് പിന്നാലെയാണ് ഉദ്യോഗസ്ഥര്‍ അന്വേഷണം ആരംഭിച്ചത്. ഘോഷയാത്രയില്‍ പങ്കെടുത്ത മുഴുവന്‍ വാഹനങ്ങളും നാളെ രാവിലെ ആര്‍.ടി.ഒ ഓഫീസില്‍ ഹാജരാക്കാന്‍ അധികൃതര്‍ കര്‍ശന നിര്‍ദ്ദേശം നല്‍കി.
നരക്കോട് സ്വദേശിയുടെ വിവാഹവുമായി ബന്ധപ്പെട്ടാണ് അഞ്ചോളം ആഡംബര വാഹനങ്ങള്‍ അണിനിരത്തി ആഘോഷം സംഘടിപ്പിച്ചത്. സംഭവത്തെക്കുറിച്ച് നാട്ടുകാര്‍ പറയുന്നത് ഇങ്ങനെ സോഷ്യല്‍ മീഡിയ റീല്‍സ് ചിത്രീകരിക്കുന്നതിനായി വാഹനങ്ങളുടെ വിന്‍ഡോയിലൂടെ പകുതിയോളം ശരീരം പുറത്തിട്ടും, കാറിന് മുകളില്‍ ഇരുന്നും യുവാക്കള്‍ യാത്ര ചെയ്തത്. നിരയായി നീങ്ങിയ വാഹനങ്ങള്‍ കാരണം മറ്റ് യാത്രക്കാര്‍ക്ക് വലിയ തോതില്‍ ഗതാഗത തടസ്സം നേരിട്ടു.
വരനും സംഘവും സഞ്ചരിച്ച വാഹനത്തിന് മുന്നിലായിരുന്നു ഈ അഭ്യാസ പ്രകടനങ്ങള്‍. വാഹനങ്ങളുടെ നമ്പര്‍ സഹിതം നാട്ടുകാര്‍ പോലീസിനും മോട്ടോര്‍ വാഹന വകുപ്പിനും പരാതി നല്‍കുകയായിരുന്നു. ദൃശ്യങ്ങള്‍ പരിശോധിച്ചതില്‍ നിന്ന് ഗതാഗത നിയമങ്ങളുടെ നഗ്‌നമായ ലംഘനം നടന്നതായി ഉദ്യോഗസ്ഥര്‍ കണ്ടെത്തി. നാളെ വാഹനങ്ങള്‍ ഹാജരാക്കിയില്ലെങ്കില്‍ രജിസ്‌ട്രേഷന്‍ റദ്ദാക്കുന്നത് ഉള്‍പ്പെടെയുള്ള നടപടികളിലേക്ക് കടക്കുമെന്ന് എം.വി.ഡി അറിയിച്ചു.
ഡ്രൈവര്‍മാരുടെ ലൈസന്‍സ് റദ്ദാക്കുന്ന കാര്യവും പരിഗണനയിലാണ്. റീല്‍സ് ചിത്രീകരണത്തിനായി വാടകയ്‌ക്കെടുത്ത ആഡംബര വാഹനങ്ങള്‍ ഉപയോഗിച്ച് ഗ്രാമീണ റോഡുകളില്‍ അഭ്യാസങ്ങള്‍ നടത്തുന്നത് വര്‍ദ്ധിച്ചുവരുന്ന സാഹചര്യത്തില്‍ വരും ദിവസങ്ങളില്‍ പരിശോധന കര്‍ശനമാക്കാനാണ് പോലീസിന്റെയും മോട്ടോര്‍ വാഹന വകുപ്പിന്റെയും തീരുമാനം.
