ന്യൂഡല്‍ഹി: ഇന്ത്യയുടെ പ്രതിരോധ മേഖലയില്‍ വിപ്ലവകരമായ മാറ്റം കുറിക്കാനിരിക്കുന്ന ‘അഗ്‌നി-6’ ബാലിസ്റ്റിക് മിസൈല്‍ പദ്ധതിക്ക് തുടക്കം കുറിക്കാന്‍ കേന്ദ്ര സര്‍ക്കാരിന്റെ പച്ചക്കൊടിക്കായി കാത്തിരിക്കുകയാണെന്ന് ഡിആര്‍ഡിഒ ചെയര്‍മാന്‍ സമീര്‍ വി. കാമത്ത്. പദ്ധതിയുടെ പ്രാഥമിക ഘട്ടങ്ങള്‍ പൂര്‍ത്തിയായതായും അനുമതി ലഭിക്കുന്ന മുറയ്‌ക്ക് നിര്‍മ്മാണ പ്രവര്‍ത്തനങ്ങളുമായി മുന്നോട്ട് പോകുമെന്നും അദ്ദേഹം വ്യക്തമാക്കി. ഡല്‍ഹിയില്‍ നടന്ന എഎന്‍ഐ നാഷണല്‍ സെക്യൂരിറ്റി സമ്മിറ്റ് 2.0-ല്‍ സംസാരിക്കുകയായിരുന്നു അദ്ദേഹം.
അഗ്‌നി പരമ്പരയിലെ ഏറ്റവും ആധുനികമായ മിസൈലായിരിക്കും അഗ്‌നി-6. 6,000 മുതല്‍ 10,000 കിലോമീറ്റര്‍ വരെ ദൂരത്തിലുള്ള ലക്ഷ്യങ്ങള്‍ തകര്‍ക്കാന്‍ ശേഷിയുള്ളതാണ് ഈ ഭൂഖണ്ഡാന്തര ബാലിസ്റ്റിക് മിസൈലാണിത്. ഒരേസമയം ഒന്നിലധികം ലക്ഷ്യങ്ങളിലേക്ക് ആണവമുനകള്‍ തൊടുക്കാന്‍ ശേഷിയുള്ള അത്യാധുനിക എംഐആര്‍വി സാങ്കേതികവിദ്യ ഇതിലുണ്ടാകും. ശത്രുവിന്റെ മിസൈല്‍ പ്രതിരോധ സംവിധാനങ്ങളെ വെട്ടിച്ച് കൃത്യതയോടെ ലക്ഷ്യസ്ഥാനത്ത് പതിക്കാനുള്ള ശേഷി അഗ്‌നി-6 നുണ്ടാകും എന്നതാണ് അഗ്നിയുടെ പ്രത്യേകതകള്‍.
ഇന്ത്യയുടെ ഹൈപ്പര്‍സോണിക് മിസൈല്‍ പദ്ധതികളും പുരോഗതിയുടെ അവസാന ഘട്ടത്തിലാണെന്ന് കാമത്ത് വെളിപ്പെടുത്തി. ഹൈപ്പര്‍സോണിക് ഗ്ലൈഡ് മിസൈല്‍, ഹൈപ്പര്‍സോണിക് ക്രൂയിസ് മിസൈല്‍ എന്നിങ്ങനെ രണ്ട് വിഭാഗങ്ങളിലാണ് ഗവേഷണം നടക്കുന്നത്. ഗ്ലൈഡ് മിസൈലിന്റെ പരീക്ഷണങ്ങള്‍ ഉടന്‍ നടക്കും. ക്രൂയിസ് മിസൈലിനേക്കാള്‍ വേഗത്തില്‍ ഗ്ലൈഡ് മിസൈല്‍ വികസിപ്പിക്കാന്‍ ഡിആര്‍ഡിഒയ്‌ക്ക് സാധിച്ചിട്ടുണ്ട്. ഗ്ലൈഡ് സിസ്റ്റം ഒരു ബൂസ്റ്റര്‍ ഉപയോഗിച്ച് വേഗത കൈവരിക്കുമ്പോള്‍, ക്രൂയിസ് മിസൈല്‍ സ്‌ക്രാംജെറ്റ് എഞ്ചിന്റെ (കരുത്തിലാണ് സഞ്ചരിക്കുന്നത്.
ഹ്രസ്വ-ദീര്‍ഘദൂര മിസൈലുകള്‍ ഉള്‍പ്പെടുന്ന ഒരു സംയോജിത മിസൈല്‍ സേന രൂപീകരിക്കുന്നതിനെക്കുറിച്ചും ഉച്ചകോടിയില്‍ ചര്‍ച്ചകള്‍ നടന്നു. ഹ്രസ്വദൂര പ്രഹരശേഷിയുള്ള ‘പ്രളയ്’ മിസൈല്‍ സംവിധാനം അവസാന ഘട്ട പരീക്ഷണത്തിലാണെന്നും ഉടന്‍ തന്നെ സായുധ സേനയുടെ ഭാഗമാകുമെന്നും അദ്ദേഹം അറിയിച്ചു. കര, വ്യോമ, നാവിക സേനകള്‍ക്കായി വിവിധ റേഞ്ചുകളിലുള്ള ബാലിസ്റ്റിക്, ക്രൂയിസ്, ഹൈപ്പര്‍സോണിക് മിസൈലുകള്‍ ഉള്‍ക്കൊള്ളുന്ന ഒരു മള്‍ട്ടി-ടിയര്‍ മിസൈല്‍ ഫോഴ്സാണ് ഇന്ത്യ ലക്ഷ്യമിടുന്നത്. ഇതിനായി നിലവിലുള്ള ചില തന്ത്രപ്രധാന ആയുധങ്ങളെ മാറ്റങ്ങള്‍ വരുത്തി ഉപയോഗിക്കാനും പദ്ധതിയുണ്ട്.
