മുംബൈ: വരാനിരിക്കുന്ന ഏകദിന ലോകകപ്പിനുള്ള ഇന്ത്യന്‍ ടീമിലെ വിക്കറ്റ് കീപ്പര്‍ സ്ഥാനത്തിനായി പോരാട്ടം മുറുകുന്നു. ഐപിഎല്‍ 2026-ലെ തകര്‍പ്പന്‍ പ്രകടനത്തോടെ മലയാളി താരം സഞ്ജു സാംസണ് മുന്‍നിരയിലേക്ക് എത്തുമ്പോള്‍, ഫോം കണ്ടെത്താന്‍ പ്രയാസപ്പെടുന്ന റിഷഭ് പന്തിന്റെ സ്ഥാനം ചോദ്യചിഹ്നമാവുകയാണ്. ചെന്നൈ സൂപ്പര്‍ കിംഗ്സിനായി പാഡണിയുന്ന സഞ്ജു സാംസണ് കരിയറിലെ ഏറ്റവും മികച്ച ഫോമിലൂടെയാണ് കടന്നുപോകുന്നത്. ഈ ഐപിഎല്‍ സീസണിലെ എട്ട് മത്സരങ്ങളില്‍ നിന്ന് രണ്ട് സെഞ്ച്വറികളടക്കം 304 റണ്‍സ് താരം അടിച്ചുകൂട്ടി.
ടി20 ലോകകപ്പിലെ പ്ലെയര്‍ ഓഫ് ദി ടൂര്‍ണമെന്റ് പുരസ്‌കാരം നേടിയ കരുത്തിലാണ് സഞ്ജുവിന്റെ വരവ്. ഏകദിനത്തില്‍ 56.66 എന്ന ഉയര്‍ന്ന ബാറ്റിംഗ് ശരാശരിയുള്ള സഞ്ജുവിനെ അവഗണിക്കാന്‍ സെലക്ടര്‍മാര്‍ക്ക് കഴിയില്ല. ലഖ്നൗ സൂപ്പര്‍ ജയന്റ്സിന്റെ നായകനായ റിഷഭ് പന്തിന് ഈ സീസണില്‍ ഇതുവരെ താളം കണ്ടെത്താനായിട്ടില്ല. എട്ട് ഇന്നിംഗ്സുകളില്‍ നിന്ന് 189 റണ്‍സ് മാത്രമാണ് താരത്തിന്റെ സമ്പാദ്യം. ഏകദിന ക്രിക്കറ്റിലെ പന്തിന്റെ ശരാശരി (33.50) സഞ്ജുവിനേക്കാള്‍ വളരെ പിന്നിലാണെന്നത് ടീം മാനേജ്മെന്റിനെ ചിന്തിപ്പിക്കുന്നുണ്ട്.
യുവതാരം ധ്രുവ് ജൂറെല്‍ മികച്ച ഫോമില്‍ തുടരുന്നതും പന്തിന്റെ ബാക്കപ്പ് കീപ്പര്‍ സ്ഥാനത്തിന് ഭീഷണിയാണ്. ദക്ഷിണാഫ്രിക്ക, സിംബാബ്വെ, നമീബിയ എന്നിവിടങ്ങളിലായി നടക്കാനിരിക്കുന്ന ഏകദിന ലോകകപ്പിനായി ടീമിനെ വാര്‍ത്തെടുക്കാനുള്ള തിരക്കിലാണ് ബിസിസിഐ. നിലവില്‍ കെ.എല്‍. രാഹുല്‍ ഒന്നാം നമ്പര്‍ കീപ്പറായി തുടരുന്നുണ്ടെങ്കിലും ബാക്കപ്പ് റോളിലേക്ക് ആര് വേണമെന്നത് പ്രധാനമാണ്. ജൂണില്‍ നടക്കാനിരിക്കുന്ന അഫ്ഗാനിസ്ഥാനെതിരെയുള്ള ഏകദിന പരമ്പര ഇക്കാര്യത്തില്‍ നിര്‍ണ്ണായകമാകും.
നിലവിലെ സാഹചര്യത്തില്‍ സ്ഥിരതയും ഫോമും പരിഗണിച്ച് പന്തിനേക്കാള്‍ മുന്‍തൂക്കം സഞ്ജു സാംസണ് തന്നെയാണെന്നാണ് ക്രിക്കറ്റ് വിദഗ്ധര്‍ വിലയിരുത്തുന്നത്. സഞ്ജുവിനൊപ്പം ധ്രുവ് ജൂറെലിനെയും അഫ്ഗാന്‍ പരമ്പരയില്‍ പരീക്ഷിച്ചേക്കാന്‍ സാധ്യതയുണ്ട്.
