തിരുവനന്തപുരം: സംസ്ഥാനത്ത് കനത്ത ചൂടിന് അൽപ്പം ആശ്വാസമേകി ഇന്നും വേനൽ മഴ തുടരും. നാല് ജില്ലകൾക്ക് യെല്ലോ അലർട്ട്. കോട്ടയം ഇടുക്കി മലപ്പുറം വയനാട് ജില്ലകൾക്കാണ് യെല്ലോ അലർട്ട്. നാളെയും സംസ്ഥാനത്ത് വേനൽ മഴ തുടരുമെന്നും കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു.
വ്യാഴാഴ്ച മധ്യ കേരളത്തിലും തെക്കൻ കേരളത്തിലും ഒറ്റപ്പെട്ടയിടങ്ങളിൽ ശക്തമായ മഴ ലഭിച്ചു. തിങ്കളാഴ്ചവരെ ഒറ്റപ്പെട്ട ശക്തമായ മഴ തുടരും.
ശക്തമായ ഇടിമിന്നലിനും 50 കിലോമീറ്റർവരെ വേഗത്തിൽ കാറ്റിനും സാധ്യതയുണ്ട്. ശനിയാഴ്ച ആലപ്പുഴ, കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂർ ജില്ലകളിലും മഞ്ഞ അലർട്ട് (ശക്തമായ മഴ) പ്രഖ്യാപിച്ചു.
മധ്യകേരളത്തിലും തെക്കൻ കേരളത്തിലും വേനൽമഴ പെയ്തതോടെ വൈദ്യുതി ആവശ്യത്തിൽ കുറവുണ്ടായിട്ടുണ്ട്. രാത്രി നിയന്ത്രണം മധ്യ, തെക്കൻ കേരളത്തിൽ ബുധനാഴ്ചയുണ്ടായില്ല. വടക്കൻ കേരളത്തിലെ ചില പ്രദേശങ്ങളിൽ മാത്രമായിരുന്നു വൈദ്യുതി നിയന്ത്രണം.
